Summary -

• अजित पवारांच्या विमान अपघातावरून घातपाताचा संशय व्यक्त करण्यात येत आहे

• शरद पवार गटाचे खासदार बजरंग सोनवणे यांनी बॉम्बचा संशय व्यक्त केला

• सीसीटीव्ही फुटेज आणि ब्लॅक बॉक्स डेटा सार्वजनिक करण्याची मागणी केली

अजित पवार यांचा विमान अपघातामध्ये मृत्यू झाला. २८ जानेवारीला बारामतीमध्ये अजित पवारांचे विमान कोसळले. या घटनेला १० दिवस झाले. या अपघाताबाबत अनेक प्रश्न आणि शंका उपस्थित केल्या जात आहेत. हा अपघात की घातपात अशा शंका व्यक्त केली जात आहे. अजित पवारांच्या राष्ट्रवादीच्या नेत्यांनी देखील या अपघाताबाबत अनेक प्रश्न उपस्थित केले. त्यानंतर आता बीडचे राष्ट्रवादी काँग्रेस शरद पवार गटाचे खासदार बजरंग सोनवणे यांनी खळबळजनक दावा केला.

'अजित पवारांच्या विमानाचे दोन व्हिडिओ समोर आले असून विमानाचा दोन वेळा स्फोट झाला. मग विमानामध्ये बॉम्ब होता का? बॉम्बने विमान उडवले गेले का?', असा प्रश्न बजरंग सोनवणे यांनी उपस्थित केला आहे. 'त्यावेळी नेमकं काय घडलं आहे? याची चौकशी झाली पाहिजे. घात की अपघात याची देखील चौकशी झाली पाहिजे आणि सर्व सीसीटीव्ही फुटेज सर्वसामान्य नागरिकांपर्यंत आले पाहिजेत. ब्लॅक बॉक्स सार्वजनिक केला पाहिजे.', अशी मागणी त्यांनी केली.

'अजितदादा देवगिरीवरून किती वाजता निघाले त्याचे सीसीटीव्ही फुटेज. एअरपोर्टवरून निघाल्याचे सीसीटीव्ही फुटेज आणि विमानात कधी बसले यांचे सीसीटीव्ही फुटेज समोर आले पाहिजे. सुरुवातीला सहा लोकांचा आकडा सांगितला गेला. मग एक कुठे गेला? ', असा सवाल देखील त्यांनी उपस्थित केला आहे. खासदार बजरंग सोनवणे यांनी केलेल्या दाव्यामुळे चर्चा होऊ लागली आहे.

दरम्यान, उपमुख्यमंत्री अजित पवार यांचा विमान अपघातामध्ये मृत्यू झाला. जिल्हा परिषद निवडणुकीच्या प्रचारासाठी बारामतीमध्ये त्यांच्या चार सभा होणार होत्या. या सभेसाठी ते मुंबईवरून बारामतीला विमानाने जात होते. सकाळी पावणे नऊच्या सुमारास बारामती एअरपोर्टजवळ त्यांचे विमान कोसळले. विमानात स्फोट झाला आणि ते खाली कोसळून त्यांचे अनेक तुकडे झाले. या अपघातामध्ये अजित पवार यांच्यासह ५ जणांचा मृत्यू झाला. या विमान अपघाताचा तपास केला जात आहे.