अजितदादांच्या विमान दुर्घटनेत झालेल्या मृत्यूला आता ७ महिने उलटले. संपूर्ण महाराष्ट्र हादरवून सोडणाऱ्या या अपघाताचं गूढ अजूनही उकललेलं नाही. पवार कुटुंबाने या संशयास्पद अपघाताची सखोल चौकशी व्हावी आणि तातडीने FIR दाखल व्हावा म्हणून आवाज उठवला, मात्र सरकारी पातळीवर कुठलीही चक्रं हललीच नाहीत.

दुसरीकडे केवळ मोदींचा फोटो हटवला म्हणून अमित ठाकरेंवर २४ तासांत एफआयआर दाखल झाल्यानं संतापलेल्या सुप्रिया सुळेंनी प्रशासनाच्या दुटप्पीपणाचा समाचार घेत सरकारसह अजितदादांच्या त्या ४० आमदारांवर आसूड ओढलाय.

सुप्रिया सुळेंनी अजितदादांच्या अपघाताची चौकशी दडपल्याचा थेट आरोप करत सरकारला तर पिंजऱ्यात उभं केलंच. पण दादांमुळे सत्ता भोगणाऱ्या राष्ट्रवादीच्या ४० आमदारांच्या भूमिकेवरही संशय घेतलाय. सुप्रिया सुळेंने सत्ताधाऱ्यांसह राष्ट्रवादीच्या आमदारांवर टिका केल्यानं आता दादाच्या अपघात प्रकरणाच्या चौकशीवरुन सत्ताधारी आणि विरोधकांमध्ये वाद पेटल्याचं दिसलंय.

सुप्रिया सुळेंच्या या घणाघाती आरोपांमुळे राष्ट्रवादीच्या नेत्यांच्या भूमिकेवर पुन्हा सवाल उपस्थित झालेत. कारण अजित पवारांच्या अकाली मृत्यूनंतर चौथ्याच दिवशी सुनेत्रा पवारांनी उपमुख्यमंत्रिपदाची शपथ घेतली.. पार्थ पवार राज्यसभा खासदार झाले... आमदारकीची टर्म संपलेले अमोल मिटकरी शांत झाले. तर जय पवारांची मागणी फक्त सोशल मीडियाच्या स्टेटसपुरतीच मर्यादित राहिली. मात्र या प्रकरणात राजकारण नको, असं म्हणत सुनेत्रा पवारांनी विरोधकांना चांगलाच टोला लगावलाय.

दादांच्या जीवावर आमदार-खासदार झालेले नेते सत्तेत मग्न राहिले, मात्र आपल्या नेत्याच्या संशयास्पद अपघाताच्या एफआयआरसाठी एकानेही अवाक्षर काढलं नाही. त्यामुळे आता आपल्या भावाला न्याय मिळवून देण्यासाठी सुप्रिया सुळेच रणशिंग फुंकणार का? हे पाहणं महत्त्वाचं ठरेल.