परभणी : आगामी स्थानिक स्वराज्य संस्थेच्या पार्श्वभूमीवर राजकीय घडामोडींना वेग आला आहे. राज्यातील विविध जिल्ह्यात राजकीय पक्षांनी मोर्चेबांधणी करण्यास सुरुवात केली आहे. राजकीय नेत्यांनी आगामी निवडणुकीच्या पार्श्वभूमीवर बैठकांचा सपाटा सुरु केला आहे. याच आगामी निवडणुकीआधी अजित पवारांनी शरद पवारांना मोठा धक्का दिलाय. शरद पवारांचा जुना खंदा नेता आता अजित पवारांच्या पक्षात काम करणार आहे.

परभणी विधान परिषदेचे माजी आमदार बाबाजानी दुर्रानी आता पुन्हा एकदा अजित पवारांच्या राष्ट्रवादीत प्रवेश करणार आहेत. बाबाजानी दुर्रानी यांनी फेसबुक पोस्ट करत अजित पवार गटात प्रवेश करणार असल्याचे जाहीर केले. बाबाजानी दुर्रानी हे पाथरीत येत्या ८ जून रोजी अजित पवारांच्या उपस्थितीत राष्ट्रवादीत प्रवेश करणार आहेत.

राष्ट्रवादीत फूट पडल्यानंतर शरद पवारांना सोडणार नसल्याचे जाहीर केले होते. मात्र, त्यानंतरही ते अजित पवारांच्या बरोबर गेले. पुढे लोकसभेच्या निकालानंतर संभाजीनगरात जाऊन शरद पवारांच्या राष्ट्रवादी प्रवेश केला होता. मात्र विधानसभा निवडणुकीत अपक्ष लढले. आता ते परत अजित पवारांच्या राष्ट्रवादीत प्रवेश करणार आहेत. त्यामुळे परभणीत अजितदादांच्या राष्ट्रवादीची ताकद वाढणार आहे.

बाबाजानी दुर्रानी यांनी फेसबुक पोस्टमध्ये काय म्हटलं?

बाबाजानी दुर्रानी म्हणाले,'मतदारसंघातील आणि जिल्ह्यातील शेकडो प्रमुख कार्यकर्त्यांच्या उपस्थितीत काल बैठक पार पडली. या बैठकीत सर्वांनी आपापली मते मांडली. आगामी निवडणुकीच्या पार्श्वभूमीवर आणि राजकीय वाटचाली संदर्भात चर्चा झाली. राज्याचे उपमुख्यमंत्री अजित पवार यांच्या नेतृत्वात राष्ट्रवादी काँग्रेस पक्षात प्रवेश करण्याचे ठरले. येत्या 8 जून रोजी जिल्हा परिषद मैदान पाथरीत भव्य मेळावा आयोजित करण्यात आला आहे. त्याठिकाणी अजित पवारांच्या प्रमुख उपस्थितीत माझ्यासह शेकडो पदाधिकारी पक्षप्रवेश करतील'.