सचिन बनसोडे, साम टीव्ही प्रतिनिधी

अहमदनगर : विधानसभा निवडणूक जाहीर होण्याआधीच नगरमधील राजकारण तापलं आहे. नगरमध्ये मंत्री राधाकृष्ण विखे पाटील आणि काँग्रेसचे वरिष्ठ नेते बाळासाहेब थोरात यांच्यात आरोप-प्रत्यारोप सुरु झाले आहेत. बाळासाहेब थोरात यांनी तलाठी भरती प्रकियेत भ्रष्टाचार झाल्याचा आरोप राधाकृष्ण विखे पाटील यांच्यावर केला आहे. यानंतर विखे पाटील यांनी थोरतांना प्रत्युत्तर दिलं आहे. 'आरोप सिद्ध करू शकले नाही तर राजकीय संन्यास घेण्यास तयार आहेत का, असं खुलं आव्हान राधाकृष्ण विखे पाटील यांनी बाळासाहेब थोरातांना दिलं आहे.

बाळासाहेब थोरात यांनी तलाठी भरती प्रकियेवरून मंत्री राधाकृष्ण विखे पाटील यांच्याविरोधात गंभीर आरोप केला आहे. 'तलाठी भरती प्रकियेत भ्रष्टाचार झाला, असा आरोप बाळासाहेब थोरात यांनी माझ्यावर आरोप केला आहे. माझं त्यांना आव्हान आहे की, त्यांनी साईमंदिरात यावे आणि समाधीवर हात ठेवून सांगावे की विखे पाटील यांनी यात भ्रष्ट्राचार केला आहे. मी काल सांगितल की, राजकारण सोडून देईल. तुम्ही माझ्यावरील भ्रष्टाचार सिद्ध करू शकला नाही, तर तुमची राजकारणातून संन्यास घेण्याची तयारी आहे का? माझ त्यांना हे आव्हान कायम आहे, असं आव्हान राधाकृष्ण विखे पाटील यांनी बाळासाहेब थोरात यांना दिलं आहे.

शरद पवार आणि मुख्यमंत्री शिंदे भेटीवर भाष्य करताना विखे पाटील म्हणाले की, 'शरद पवार मुख्यमंत्र्यांना का भेटले? काय चर्चा झाली, याची मला कल्पना नाही. आगामी विधानसभेत महाविकास आघाडीला सत्ता येणार नसल्याची खात्री आहे. महायुतीचं सरकार पुन्हा एकदा राज्यात येणार आहे. महायुतीचे सरकार येणार असल्याने जवळीक साधण्याचा शरद पवार यांचा हेतू असला पाहिजे'.

शिर्डी एमआयडीसीवरही विखे पाटील यांनी भाष्य केलं. 'शिर्डी एमआयडीसीसाठी ५०० एकर जागा मिळाल्याने औद्योगिक विकासाला चालना मिळाली आहे. रोजगार निर्मीती होते, उद्योग येतायत. परिसरातील तरूणांमध्ये नवी आशा आपण निर्माण करतोय. मला त्याचे वेगळ समाधान व्यक्तिश: आहे,असे विखे पाटील पुढे म्हणाले.