सुशिल थोरात, प्रतिनिधी...

Ahmednagar News: गेल्या महिन्यात ३० मे रोजी विधान परिषदेचे आमदार राम शिंदे यांना जीवे मारण्याची धमकी देण्यात आली होती. या धमकी प्रकरणात आता महत्वाची माहिती समोर आली असून धमकी देणाऱ्याला मध्य प्रदेशातून अटक करण्यात पोलिसांना यश आले आहे. आरोपी सागर सुभाष गवासणे (वय ३४) हा मूळचा जामखेड तालुक्यातील आहे. सध्या तो पुण्यात वाकड परिसरात राहतो.

याबाबत अधिक माहिती अशी की, महिनाभरापूर्वी अहिल्यादेवी होळकर यांच्या जयंती निमित्त फेसबुक लाईव्ह करत भाजप आमदार राम शिंदे यांना घरात घुसून जीवे मारण्याची धमकी मिळाली होती. या धमकीनंतर राजकीय वर्तुळात एकच खळबळ उडाली होती. या धमकीनंतर जामखेड पोलीस ठाण्यात 504,505(2),506(2)) नुसार गुन्हा दाखल करण्यात आला होता.

आता या धमकी देणाऱ्यास मध्यप्रदेशच्या उज्जैन परिसरातून अटक करण्यात आली आहे. आरोपी मुळचा जामखेडचा असून गुन्हा केल्यानंतर तो मध्य प्रदेशात पळून गेला होता. तेथून पोलिसांनी त्याला ताब्यात घेतले आहे.

धक्कादायक बाब म्हणजे आरोपी गवासणे सराईत गुन्हेगार आहे. त्याच्याविरूद्ध नगरसह बीड आणि धाराशिव जिल्ह्यातही गंभीर स्वरूपाचे १० गुन्हे दाखल आहेत. खुनाचा प्रयत्न आणि अवैधरित्या शस्त्र बाळगल्याचे गुन्हेही त्याच्याविरूद्ध आहेत. त्यामुळे पोलिस याचा सखोल तपास करत आहेत. (Latest Marathi News)