सुशील थोरात

अहमदनगर : अहमदनगर शहरात मनोज जरांगे पाटील यांची शांतता रॅली सोमवारी झाली. या रॅली दरम्यान गर्दीचा फायदा घेत चोरट्यानी हात साफ केले. चोरीच्या अनेक घटना समोर आल्यानंतर अहमदनगरच्या कोतवाली पोलिसांनी एक टोळीला पकडले. या १४ जणांच्या या टोळीतील आरोपींकडून ६ लाख ५० हजारांचा मुद्देमाल पोलिसांनी हस्तगत केला आहे. 

मनोज जरांगे पाटील (Manoj Jarange Patil) यांच्या शांतता रॅली राज्यभरात ठिकठिकाणी काढल्या जात आहेत. दरम्यान पुणे येथे झालेल्या रॅलीत मोठ्या प्रमाणात चोऱ्या झाल्या होत्या. त्या अनुषंगाने नगर (Ahmednagar) शहर पोलिसांनी या रॅलीमध्ये साध्या वेशातील कपड्यांवर पोलीस चोरट्यांवर नजर ठेवून होते. पोलिसांच्या या टाकलेल्या सापळ्यामध्ये चोरटे अलगद सापडले असून ही मोठी टोळी मनोज जरांगे पाटील यांच्या प्रत्येक शांतता रॅलीमध्ये सहभागी होत असे आणि चोरी करून पुन्हा दुसऱ्या शहरात जात असल्याची माहिती पोलिसांना या टोळीकडून मिळाली आहे. 

पोलिसांनी (Police) ताब्यात घेतलेल्या या टोळीतील १४ जण कपाळाला गंध लावून रॅलीमध्य सहभागी होत असत. गर्दीत सोन्याच्या चैन, पाकीट याच्यावर ही टोळी डल्ला मारत होती. या टोळीकडून एक स्विफ्ट चारचाकी वाहन, एक दुचाकी वाहन, ७ मोबाईल फोन आणि रोख रक्कम असा ६ लाख ५० हजारांचा मुद्देमाल जप्त करण्यात आल्याची माहिती कोतवाली पोलीस स्टेशनचे पोलीस निरीक्षक प्रताप दराडे यांनी दिली आहे.