सचिन बनसोडे 
संगमनेर (अहिल्यानगर) : चोरट्यानी मंदिरांना लक्ष केले असून देवाच्या अंगावरील दागिन्यांसह दानपेटीतील रोख रक्कम लांबविली जात आहे. अशातच संगमनेर तालुक्यातील श्रीक्षेत्र काकडवाडी येथील जागृत देवस्थान महालक्ष्मी माता काकडवाडी मंदिर या ठिकाणी मध्यरात्रीच्या सुमारास जबरी चोरीची घटना घडली आहे. यात सोने व चांदीचे दागिने चोरटे घेऊन पसार झाले आहेत. या प्रकरणी पोलीस तपास करत आहेत. 

अहिल्यानगर जिल्ह्याच्या संगमनेर तालुक्यातील काकडवाडी येथील जागृत देवस्थान असलेल्या श्री महालक्ष्मी मंदिरात चोरी झाली आहे. जागृत देवस्थान असल्याने याठिकाणी भाविक मोठ्या संख्येने दर्शनासाठी येत असतात. आलेल्या भाविकांकडून देवीला अलंकार किंवा रोख स्वरूपातील रक्कम मोठ्या प्रमाणात दिली जात असते. मात्र रात्री मंदिर बंद झाल्यानंतर चोरट्यानी संधी साधत दागिने चोरी केले आहेत. 

सोने- चांदीच्या वस्तूंसह मौल्यवान वस्तू लांबविल्या 

काल मध्यरात्रीच्या सुमारास अज्ञात चोरट्यांनी महालक्ष्मी मंदिर येथील देवीचा ५१ तोळ्यांचा सोन्याचा मुकुट तसेच दोन किलो चांदीच्या वस्तूसह इतर मौल्यवान वस्तू देखील चोरट्यांनी चोरून नेत पोबारा केला आहे. सकाळी दर्शनासाठी आलेल्या भाविकांना सोन्याचा मुकुट दिसून आला नाही. यानंतर चोरी उघड झाली. या बाबत पोलिसांना माहिती देण्यात आली होती. पोलिसांनी घटनास्थळी येत पाहणी केली. 

सीसीटीव्हीच्या डीव्हीआरही लांबविला 

घटनास्थळी पोलीस उपविभागीय अधिकारी डॉ. कुणाल सोनवणे, पोलीस निरीक्षक देविदास ढुमणे, पोलीस उपनिरीक्षक सातपुते, पोलीस उपनिरीक्षक अशोक मोकळ यांनी भेटी दिल्या आहेत. तपासकामी अहिल्यानगरहून ठसा तज्ञ व शवान पथकाला पाचारण करण्यात आले होते.सदर घटनेचा लवकरात लवकर शोध लावावा अशी मागणी काकडवाडी ग्रामस्थांनी केली आहे. दरम्यान चोरट्यांनी मंदिरातील सीसीटीव्हीचा डीव्हीआर देखील लांबविला असल्याने चोरट्याना शोधण्याचे आव्हान पोलिसांसमोर आले.