सुशिल थोरात, साम प्रतिनिधी

जामखेड-बीड रोडवरील हॉटेल कावेरी येथे बुधवारी मध्यरात्री घडलेल्या थरारक घटनेने परिसर हादरून गेला. सात ते आठ जणांच्या संशयित टोळीने हॉटेलवर अंदाधुंद गोळीबार केला. या हल्ल्यात हॉटेल मालक रोहित अनिल पवार हे गंभीर जखमी झालेत.

टोळक्यानं आधी रोहित अनिल पवार यांच्या हॉटेलची तोडफोड करत अंदाधुंद गोळीबार केला. यामुळे परिसरात भीतीचे वातावरण निर्माण झाले आहे. या गोळीबारात हॉटेल मालक रोहित अनिल पवार हे गंभीर जखमी झालेत. त्यांच्या पायात गोळी लागल्याने त्यांची प्रकृती चिंताजनक आहे. त्यांना तात्काळ अहिल्यानगर येथील खासगी रुग्णालयात दाखल करण्यात आले आहे. पोलीस हल्लेखोरांच्या मागावर आहेत. गोळीबाराचे नेमके कारण काय याचा पोलीस तपास करत आहेत.

पोलिसांनी दिलेल्या माहितीनुसार, न्यू कावेरी हॉटेलचे मालक रोहीत अनिल पवार हे आपल्या हॉटेलच्या समोर उभे होते. त्यावेळी एक स्विफ्ट कार आली, त्या कारमधून ५ ते ७ जण उतरले. त्यातील ३ जणांकडे गावठी कट्टा होता आणि त्यांनी गोळीबार सुरू केला. त्यावेळी मालक रोहित पवार आपला जीव वाचवण्यासाठी हॉटेलमागे पळाले.

त्यावेळी त्यांच्या पायाला एक गोळी लागली होती. काही अंतर पळाल्यानंतर ते अंधारात लपून बसले. त्यानंतर काहीजण परत हॉटेलला आले त्यांनी हॉटेलची तोडफोड केली. त्यानंतर हॉटेल मालक रोहित पवार यांच्या कारची देखील तोडफोड केली. याप्रकरणात एका आरोपीला ताब्यात घेतलंय.