अहिल्यानगरमधून धक्कादायक बातमी समोर आली आहे. प्लॉटच्या व्यवहारातील उसने पैसे परत मागितल्याच्या कारणावरून जिल्ह्यातील कोपरगाव तालुक्यात एका ३५ वर्षीय तरुणाची निर्घृण हत्या करण्यात आली. ही घटना काल रात्रीच्या सुमारास घडली असून या प्रकरणी चार जणांविरोधात कोपरगाव शहर पोलीस ठाण्यात गुन्हा दाखल करण्यात आला आहे. दरम्यान पोलीस पुढील तपास करत आहेत.

मिळालेल्या माहितीनुसार, सदर घटना अहिल्यानगरमधील कोपरगाव तालुक्यातील डाऊच खुर्द गावात घडली असून मृत तरुणाचे नाव अस्लम शहाबुद्दीन सय्यद असे आहे. अस्लम याचा प्लॉटच्या व्यवहारातील उसने पैसे परत मागितल्याच्या कारणातून काही तरुणांशी वाद झाला. या वादातून संतापलेल्या काही तरुणांनी अस्लमवर हल्ला केला. या हल्ल्यात अस्लमचा जागीच मृत्यू झाला.

आरोपींनी अस्लम याला लाथाबुक्क्यांनी मारहाण करत त्याच्यावर चाकूने वार करत त्याची हत्या केली. या प्रकरणी पोलिसांत तक्रार दाखल करण्यात आली. पोलिसांनी मिळालेल्या माहितीनुसार घटनास्थळी धाव घेत घटनेचा पंचनामा करत मृतदेह ताब्यात घेतला आहे.

तसेच पोलिसांनी मुनीर उर्फ मुन्ना अजिज शेख, परविन मुनीर शेख, फिरोज मुनीर शेख आणि साहिल मुनीर शेख या चार जणांना हत्या प्रकरणात ताब्यात घेत गुन्हा दाखल केला आहे.या घटनेनंतर परिसरात भीतीचे वातावरण निर्माण झाले असून नागरिकांच्या सुक्षितेतेवर प्रश्नचिन्ह निर्माण झाले आहे.