Daryapur News: दर्यापूर तालुक्यातून एक दु:खद घटना समोर आली आहे. पोलीस भरतीची तयारी करत असलेल्या मुलीचा अपघातात मृत्यू झाला आहे. दिव्या टापरे (वय वर्षे २१) असे मृत तरुणीचे नाव आहे. दर्यापूर तालुक्यातील थिलोरी येथे असलेल्या मुख्य रस्त्यावर मॉर्निंग वॉक करताना तिचा अपघात झाला. (Latest Marathi News)

मिळालेल्या माहितीनुसार दिव्या रोज पहाटे तिच्या मैत्रिणींबरोबर मॉर्निंग वॉकला (Morning Walk) जात होती. नेहमीप्रमाणे सकाळी सहाच्या सुमारास तिने मुख्य रस्त्याने मॉर्निंग वॉक करायला सुरूवात केली. याच दरम्यान भातकुली मार्गाने दर्यापूरच्या दिशेने भरधाव वेगाने जात असलेल्या एका अज्ञात वाहनाने तिला जोरात धडक दिली. या अपघातात दिव्या फार जखमी झाली. तिला तात्काळ रुग्णालयात नेण्यात आले. मात्र उपचार सुरु असतानाच तिचा दुर्देवी मृत्यू झाला.

तिच्या निधनाने संपूर्ण गावावर शोककळा पसरली आहे. दिव्याला पोलीस बनायचे होते. यासाठी तिचा सराव सुरु होता. घरची आर्थिक परिस्थिती बेताची असल्याने पोलीस (Police) होऊन आई बाबांसाठी तिला काही तरी करायचे होते. मात्र तिचे हे स्वप्न आता फक्त स्वप्नच राहीले आहे. मुलीच्या निधनाने टापरे कुटुंबीयांवर दु:खाचा डोंगर कोसळला आहे.