महायुतीचे सरकार स्थापन झाल्यानंतर डिसेंबरमधील 'लाडकी बहीण योजने'च्या हप्त्याची वाट पाहणाऱ्या महिलांसाठी आनंदाची बातमी आहे. लाडकी बहीण योजनेचा हप्ता लवकरच दिला जाणार असल्याची माहिती मुख्यमंत्री देवेंद्र फडणवीस यांनी गुरूवारी विधिमंडळाच्या हिवाळी अधिवेशनात दिली.

महायुतीनं निवडणूक जाहीरनाम्यात लाडकी बहीण योजनेतील मदत १५०० रुपयांवरून २११०० रुपये करण्याचं आश्वासन दिलं होतं. मात्र, अद्याप हा हप्ता देण्यात आलेला नाही. लाडकी बहीण योजनेचा डिसेंबरसाठीचा हप्ता हिवाळी अधिवेशनाच्या समाप्तीनंतर दिला जाणार असल्याची माहिती मुख्यमंत्री देवेंद्र फडणवीस यांनी विधानसभेत दिली.

सार्वजनिक बांधकाम विभागाने मुख्यमंत्री सचिवालय परिसरात अधिवेशनाच्या पार्श्वभूमीवर राज्य शासनाच्या विविध विभागांची शिबिर कार्यालये उभारली आहेत. राज्य शासनाच्या महत्वाकांक्षी मुख्यमंत्री माझी लाडकी बहीण योजनेवर महारांगोळी याच परिसरात मुख्यमंत्री कार्यालयाच्या मागील भागात साकारली आहे.

१२ सेमी उंचीच्या डायसवर २८८ फूट आकाराची (१२ बाय २४ फूट) ही सुबक रांगोळीने सर्वांचे लक्ष वेधून घेतले. येथे लाडक्या बहिणींची प्रतिकृती आणि मुख्यमंत्री देवेंद्र फडणवीस, उपमुख्यमंत्री एकनाथ शिंदे, उपमुख्यमंत्री अजित पवार यांच्या प्रतिकृती रेखाटल्या असून रांगोळी कलावंत सुनील तरारे यांच्या नेतृत्वात नागपूर व यवतमाळ येथील पाच कलाकारांनी ६० किलो रांगोळीचा यासाठी उपयोग केला.