माधव सावरगावे, नांदेड

नांदेडमधून हृदयद्रावक घटना समोर आली आहे. आनंदाने आजोळी आलेल्या अवघ्या तीन वर्षांच्या निष्पाप चिमुकल्याला भराधव हायवा ट्रकने चिरडले. या दुर्घटनेत त्याचा मृत्यू झाला. सदर अपघात नवीन कौठा येथील चौकात काल सकाळच्या सुमारास घडला असून चिमुकल्यासह त्याचे वृद्ध आजोबा देखील जखमी झाले आहेत. मृत चिमुकल्याचे नाव प्रणव संपत आचार्य असे आहे, तर त्याचे आजोबा राजेश माधवराव भुतके असे आहे.

बीड जिल्ह्यातील अंबेजोगाई तालुक्यातील बागझरी येथील प्रणव आचार्य हा तीन दिवसांपूर्वीच त्याच्या आईसोबत नवीन कौठा येथील आजोबांच्या घरी आला होता. घटना घडली त्या दिवशी प्रणव हा त्याचे आजोबा राजेश भुतके यांच्यासोबत सकाळी साडेसातच्या सुमारास जॉगिंगला गेला होता.

जॉगिंग करून दोघे घराकडे परत येत असतानाच आय. जी. ऑफीससमोर वाय पॉइंटवर (पी.व्ही.आर.समोरील चौकात) हा अपघात झाला. मुरूम टाकून येणाऱ्या या भरधाव वेगातील हायवा ट्रकच्या चालकाने निष्काळजीपणे वळण घेत पादचारी असलेल्या आजोबा-नातवाला जोरदार धडक दिली.या धडकेत आजोबा गंभीर जखमी झाले तर ३ वर्षाच्या प्रणवचा जागीच मृत्यू झाला.

मृत चिमुकल्याच्या आजोबांवर विष्णूपुरी येथील शासकीय रुग्णालयात उपचार सुरू आहेत. याप्रकरणी मृत प्रणवचे मामा नागेश राजेश भुतके यांच्या तक्रारीवरून नांदेड ग्रामीण पोलीस ठाण्यात आरोपी वाहनचालका विरुद्ध तक्रार दाखल करण्यात आली आहे. पोलिसांनी आरोपी वाहनचालकास तातडीने ताब्यात घेतले आहे. या घटनेमुळे भरधाव वेगातील अवजड वाहने आणि निष्पाप पादचारी नागरिकांच्या सुरक्षिततेचा मुद्दा पुन्हा एकदा ऐरणीवर आला आहे.