Samruddhi Mahamarg News Today: समृद्धी महामार्गावरील अपघातांचे (Samruddhi Mahamarg Accident) सत्र सुरूच आहे. आज पुन्हा या महामार्गावर भीषण अपघात झाल्याची घटना समोर आली आहे. सिन्नरजवळ समृद्धी महामार्गावर भरधाव कारला भीषण अपघात (Car Accident) झाला. या अपघातामध्ये कारमधील दोघांचा जागीच मृत्यू झाला. या अपघाताचा तपास नाशिक पोलिसांकडून (Nashik Police) सुरु आहे.

मिळालेल्या माहितीनुसार, समृद्धी महामार्गावर इगतपुरी ते शिर्डी टप्प्यात सिन्नरजवळ काराला भीषण अपघात झाला. मध्यरात्री एकच्या सुमारास ही घटना घडली. भरधाव कार ३ ते ४ पलट्या खात दुभाजकाच्या साईड बॅरिकेट्सला धडकली. त्यानंतर ही कार दोन्ही लेनच्या मधोमध जाऊन पडली. चालकाचे कारवरील नियंत्रण सुटल्यामुळे हा अपघात झाल्याची माहिती समोर येत आहे.

या अपघातामध्ये कारमध्ये असलेल्या दोघांचा जागीच मृत्यू झाला. मृत्यू झालेले दोन्ही व्यक्ती हे श्रीरामपूरचे असल्याची माहिती समोर आली आहे. अपघाताची माहिती मिळताच पोलिसांनी घटनास्थळी धाव घेतली. दोघांचे मृतदेह ताब्यात घेत पोलिसांनी शवविच्छेदनासाठी रुग्णालयात पाठवले आहेत. या अपघाताचा तपास पोलीस करत आहेत. हा अपघात इतका भीषण होता की कारचा चक्काचूर झाला आहे.

दरम्यान, भिमाशंकर- मंचर मार्गावर देखील कारला अपघात झाल्याची घटना समोर आली आहे. गोहे येथील भाविकांच्या कारला अपघात झाला. भिमाशंकरवरुन दर्शन घेऊन परत येत असताना ही घटना घडली. या अपघातात कारमधील भाविक किरकोळ जखमी झाले आहेत. अपघातामध्ये कारने दोन वेळा पलटी खाल्ल्या. त्यानंतर ही कार खोल खड्ड्यात पडली. स्थानिक नागरिकांनी घटनास्थळी धाव घेत मदकार्य केले आणि जखमींना रुग्णालयात दाखल केले.