अभिजीत देशमुख, कल्याण

17 year old boy killed in Kalyan : कल्याणमध्ये अल्पवयीन मुलीच्या हत्येची घटना ताजी असतानाच, एका १७ वर्षीय मुलाची निर्घृण हत्या करण्यात आली. कल्याण पूर्वेकडील खडेगोळवली परिसरात ही धक्कादायक घटना घडली आहे.

समीर लोखंडे (वय १७) असे हत्या झालेल्या मुलाचे नाव आहे. कल्याण पूर्वेकडील खडेगोळवली परिसरात ही घटना घडली. १० ते १२ जणांच्या टोळक्यानं या मुलाला बेदम मारहाण केली. या मारहाणीत मुलाचा मृत्यू झाला. कोळसेवाडी पोलिसांनी तात्काळ कारवाई करत, काही संशयित आरोपींना ताब्यात घेतले आहे. (Latest Marathi News)

किरकोळ कारणावरून घेतला जीव

कल्याण पूर्वेकडे काल, शुक्रवारी दहा ते बारा जणांच्या टोळक्यानं १७ वर्षीय मुलाला मारहाण केली. या मारहाणीत त्याचा मृत्यू झाला. क्षुल्लक कारणावरून टोळक्यानं या मुलाचा जीव घेतला, असे सांगण्यात येत आहे. हत्या करणाऱ्या काही संशयित आरोपींना कोळसेवाडी पोलिसांनी ताब्यात घेतले असून, वृत्त हाती येईपर्यंत गुन्हा दाखल करण्याची प्रक्रिया सुरू होती.

कल्याणमध्ये चाललंय काय?

कल्याणमध्ये गुन्हेगारी घटनांमध्ये वाढ होताना दिसतेय. काही दिवसांपूर्वी कल्याणमध्ये भररस्त्यात एका अल्पवयीन मुलीवर अतिप्रसंग करण्याचा प्रयत्न झाला होता. तरुणावर कोयत्याने हल्ल्याची घटनाही घडली होती. दोनच दिवसांपूर्वी एका अल्पवयीन मुलीची हत्या करण्यात आली होती. त्यामुळे कल्याण आणि परिसरात कायदा आणि सुव्यवस्थेचा प्रश्न ऐरणीवर आला आहे. गुन्हेगारी रोखण्यासाठी पोलिसांनी गस्त वाढवली. उपाययोजना सुरू केल्या आहेत. तरीही गुन्हेगारी थांबताना दिसत नाही.