महाराष्ट्र विधानसभा निवडणुकीसाठी आज मतदान होणार असून यासाठी सुरुवात झालेली आहे. राज्यातील 36 जिल्ह्यांमधील 288 विधानसभा मतदारसंघामध्ये मतदान प्रक्रिया पार पडत असताना छत्रपती संभाजी नगरमधून एक धक्कादायक घटना समोर आली आहे. यावेळी शहराच्या मुख्य गेटवरून पोलिसांनी ११ लाखांहून अधिकची रक्कम जप्त केली आहे.

स्थिर सर्वेक्षण पथकाची कारवाई

मतदान होण्याच्यापूर्वीच ही घटना समोर आली आहे. यावेळी शहराच्या मुख्य गेटवर पोलिसांकडून ११ लाख २१ हजार रूपयांची रक्कम जप्त करण्यात आली आहे. छत्रपती संभाजी नगर हर्सूल टी पॉइंट याठिकाणी स्थिर सर्वेक्षण पथकाने ही कारवाई करत तब्बल 11 लाख 21 हजार रुपये जप्त केले आहेत.

मिळालेल्या माहितीनुसार, छत्रपती संभाजीनगर स्थिर सर्वेक्षण पथकाची हर्सूल टी पॉइंट याठिकाणी कारवाई केली आहे. या प्रकरणात एका कारची तपासणी करण्यात आली. यावेळी या गाडीत एका बॅगेमध्ये तब्बल ११ लाख २१ हजार रूपये सापडले आहे. जळगावच्या दिशेने येणाऱ्या कारची चेकिंग करतेवेळेस ही रक्कम आढळून आली आहे. दरम्यान ही रक्कम कोणाकडून आली आहे, याची माहिती मिळू शकलेली नाही. दरम्यान याबाबत चौकशी सुरु आहे.