Maharashtra Assembly Election 2024: विधानसभा निवडणुकीसाठी महाराष्ट्र भाजपने ९९ जागांची पहिली उमेदवारी यादी जाहीर केली. त्यामुळे महायुतीने मविआला मागे टाकत एक पाऊल पुढे टाकल्याची चर्चा सुरु झाली होती. पण आता मविआप्रमाणेच महायुतीमध्येही वाद असल्याचे समोर आले आहे. महायुतीमध्ये शिवसेनेचे घोडं २५ जागांवर अडकल्याची समोर आले आहे.

महायुतीमध्ये शिवसेना आणि भाजप यांच्यामध्ये काही जागांवर एकमत होत नाही. सूत्रांनी दिलेल्या माहितीनुसार, महायुतीत शिवसेनेचं घोडं २५ जागांवर अडून आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस, चंद्रशेखर बावणकुळे आणि प्रफुल्ल पटेल यांच्या बैठकीत यावर चर्चा झाली, पण त्यावर तोडगा निघाला नाही.

भाजपने पहिली यादी जाहीर केल्यानंतर सोमवारी झालेल्या बैठकित मुख्यमंत्र्यांनी ६० नावांची यादी बैठकीत मांडल्याची माहिती सूत्रांनी दिली. यावेळी विद्यमान आमदारांना तिकिट देण्यावर सकारात्मक चर्चा झाली. उर्वरित २५ जागांचा प्रस्ताव शिवसेनेकडून मांडण्यात आल्याचे कळते. त्यावर स्थानिक पक्षीय बलाबल, जातिय राजकारण या जागांवर तीन पक्षातील प्रमुख नेते बसून निर्णय घेतला जाणार असल्याची माहिती मिळत आहे.

महायुतीमधील जागावाटप पूर्ण झाल्याचे सांगितले जात होतं, पण अद्याप शिवसेना आणि भाजप यांच्यामध्ये २५ जागांवर एकमत झाले नाही. सूत्रांनी मिळेल्या माहितीनुसार, तिन्ही पक्षामध्ये चर्चा सुरु आहे. लवकरच यावर तोडगा निघू शकतो. कोणत्याही क्षणी अजित पवार आणि एकनाथ शिंदे यांची पहिली उमेदवारी यादी जाहीर होऊ शकते.