भरत मोहोळकर, साम प्रतिनिधी

भाजपनं महाराष्ट्रात हिंदुत्वाचा मुद्दा अधिक प्रखर करण्यासाठी बटेंगे तो कटेंगेचा नारा दिला खरा...मात्र आता या नाऱ्याला भाजपमधूनच विरोध होऊ लागलाय. पंकजा मुंडे यांच्या नंतर आता अशोक चव्हाण यांनीही बटेंगे तो कटेंगेच्या नॅरेटीव्हला विरोध दर्शवलाय. विशेष म्हणजे हा भाजप नेत्यांचा नारा नसल्याचा खुला दावा त्यांनी केलाय. त्यामुळे स्टार प्रचारक योगी आदित्यनाथ यांनी दिलेल्या नाऱ्यावरून भाजपमधले अंतर्गत मतभेद उफाळून आले आहेत.

विशेष म्हणजे योगी आदित्यनाथ यांच्या बटेंगे तो कटेंगेच्या नाऱ्यालाच पुढे नेत पंतप्रधान मोदींनी एक है तो सेफचा नारा दिला. त्यामुळे केंद्रीय नेतृत्वाच्या संमतीनंच महाराष्ट्रात कट्टर हिंदुत्त्वाचं नॅरेटीव्ह सेट करण्याचा प्रयत्न सुरू आहे. मात्र कडक पक्षशिस्त असलेल्या भाजपमध्ये काही नेत्यांनी खुला विरोध केलाय. या नाऱ्याविरोधात कोणता नेता काय म्हटला तेही पाहूयात..

बटेंगे-कटेंगेला भाजपामधूनच विरोध

बटेंगे-कटेंगे घोषणेची महाराष्ट्रात आवश्यकता नाही -पंकजा मुंडे

बटेंगे तो कटेंगे या घोषणेचं मी समर्थन करू शकत नाही - राधाकृष्ण विखे पाटील

मुळात महायुतीचा मित्रपक्ष असलेल्या राष्ट्रवादीचे सर्वेसर्वा अजित पवारांनीही यापूर्वीच ही घोषणा महाराष्ट्रात चालणार नसल्याचं विधान केलंय. तर या सर्व नाराजांना घोषणेचा अर्थच समजला नसल्याचं फडणवीसांचं म्हणणंय.

भाजपने धार्मिक धृवीकरणासाठी दिलेल्या बटेंगे तो कटेंगे घोषणेला आधी महाविकास आघाडीने विरोध केला होता.मात्र आता भाजप आणि महायुतीतील मित्रपक्षही विरोध करायला लागल्याने भाजपची डोकेदुखी वाढलीय.. त्यामुळे बटेंगे तो कटेंगेच्या नॅरेटीव्हचा भाजपला फायदा होणार की यामुळे भाजपच्या मतांमध्ये फाटाफूट होणार याकडे लक्ष लागलंय.