महाराष्ट्र विधानसभा निवडणुकीत बंडखोरांनी अपक्ष उमेदवारी अर्ज दाखल करून जबरदस्त 'तडका' दिला आहे. सत्ताधारी महायुतीतील प्रमुख पक्ष असलेल्या भाजपलाही बंडखोरीचं ग्रहण लागलं आहे. पण नेत्यांनी उपसलेले बंडाचे हत्यार पुन्हा म्यान करण्यासाठी भाजपच्या वरिष्ठ नेत्यांनी स्पेशल प्लान आखला आहे. बंडखोरीचा इशारा दिलेले किंवा थेट बंडाचा झेंडा हाती घेतलेल्या नेत्यांची समजूत काढण्याची रणनीती आखलेली आहे. त्यांच्याशी प्रत्यक्ष भेटून चर्चा केली जाणार आहे. भाजपचे नेते आणि माजी खासदार गोपाळ शेट्टी यांनीही बंडाचे निशाण फडकावले आहे. त्यांनी अपक्ष उमेदवारी अर्ज भरला आहे.

याबाबत अधिक माहिती देताना साम टीव्हीचे मुंबईतील प्रतिनिधी गणेश कवडे यांनी सांगितले की, भाजपचे नेते पक्षातील बंडखोरी शमवण्यासाठी प्रयत्न करणार आहेत. दुसरीकडे, गोपाळ शेट्टी यांचे म्हणणे आहे की, बोरिवलीत वारंवार बाहेरचे उमेदवार का दिले जातात? बोरिवलीतील जनता याबाबत आम्हाला विचारणा करत आहे. त्यामुळेच अर्ज दाखल केला आहे. आता शेट्टींची समजूत काढण्याचा प्रयत्न भाजपचे नेते करत असून, त्यांच्यासोबत चर्चा करून भूमिका जाणून घेतली जाणार असल्याचे सांगण्यात येत आहे. दरम्यान, गोपाळ शेट्टींसोबत चर्चा करण्याची जबाबदारी विनोद तावडे यांच्याकडे देण्यात आल्याचे कळते.