भरत मोहळकर, साम प्रतिनिधी

अजितदादा नेमकं काय म्हणालेत? आणि दादा बारामती सोडणार असं का म्हणत होते? त्यावरचा हा स्पेशल रिपोर्ट. राज्यात सर्वाधिक चर्चेत असलेल्या बारामती मतदारसंघात यंदा काका विरुद्ध पुतण्या लढत होणार आहे. बारामतीत अजित पवारांचा विजयरथ रोखण्यासाठी पुतण्या युगेंद्र पवार निवडणुकीच्या रिंगणात उतरलेत.त्यापार्श्वभुमीवर अजित पवारांनी हवेली तालुक्यातील लोणी काळभोरमध्ये बोलताना आपण बारामतीत निवडणूक लढवणार नव्हतो, असा खळबळजनक गौप्यस्फोट अजित पवारांनी केलाय.

लोकसभेला बारामतीत अजित पवारांच्या पत्नी सुनेत्रा पवारांचा पराभव झाल्याने दादांनी बारामतीतून न लढण्याचा निर्णय घेतला होता. त्यानंतर अजित पवारांनी शिरुर-हवेली, सिन्नर, पुरंदर या मतदारसंघातून निवडणूक लढवावी, असा आग्रह कार्यकर्त्यांनी धरल्याचं अजित पवारांनी म्हटलंय.. मात्र अजित पवार बारामती सोडून इतर मतदारसंघात चाचपणी करण्यामागची कारणं काय होती? पाहूयात

दादा बारामती का सोडणार होते?

लोकसभेला सुळेंना बारामतीतून 48 हजार मतांचं लीड

लोकसभेप्रमाणेच पुन्हा विधानसभेला पवार कुटुंबात सामना टाळण्याचा प्रयत्न

बारामतीत अडकून पडल्यास राज्यातील प्रचारावर मर्यादा येण्याची शक्यता

बारामतीतून लढण्यास इच्छूक नसल्याचं दादांनी वक्तव्य केलं होतं. त्यानंतर बारामतीत अजित पवारांच्या समर्थकांनी आंदोलन करत अजित दादांना आपली भूमिका बदलण्यास भाग पाडलं. मात्र लोकसभेला झालेला दगाफटका लक्षात घेता सावध झालेल्या अजित पवारांनी इतर मतदारसंघात चाचपमी केली होती. मात्र आता अजितदादा बारामतीकरांवर विश्वास ठेवल्याचा संदेश देण्याचा प्रयत्न करत असल्याचं दिसतंय. त्यामुळे अजित पवारांच्या भावनिक आवाहन बारामतीकर स्वीकारणार की बारामतीत दादा बदलणार? याची उत्सुकता आहे.