भरत मोहळकर

कोल्हापूर आणि हातकणंगले मतदारसंघातील लढतींकडे संपूर्ण राज्याचं लक्ष लागलं होतं. तर आता मतदानानंतरही गावागावातील गल्ली, चौक, पार आणि चावडीवर कोण बाजी मारणार? याचीच चर्चा रंगलीय. पण ही फक्त चर्चाच नाही तर कार्यकर्त्यांमधील इर्षा आणि उमेदवारांप्रती असलेली निष्ठा यामुळे पाचशे रुपयांपासून लाखांच्या पैंजा लागल्या आहेत. त्यामुळे राज्यभर कोल्हापूर जिल्हा पुन्हा चर्चेच्या केंद्रस्थानी आलाय.

कोल्हापूर निवडणुकीच्या मैदानात स्वत: शाहू महाराज छत्रपती उतरल्यामुळे सा-या राज्याचं लक्ष या लढतीकडे लागलंय. गादीचा मान आणि कोल्हापुरात वाढलेला मतदानाच्या टक्क्यामुळे आता थेट विजयाबाबत लाखांच्या पैजा लावल्या जात आहेत. कोल्हापूरसह हातकणंगलेमध्येही तिरंगी लढत रंगल्यामुळे इथंही पैजांना ऊत आलाय. हातकणंगलेत महायुतीचे धैर्यशील माने, स्वाभिमानी शेतकरी संघटनेचे राजू शेट्टी आणि महाविकास आघाडीचे सत्यजित पाटील अशी तिरंगी लढत पहायला मिळाली.

कोल्हापूर जिल्हा आपल्या रांगडेपणासाठी प्रसिद्ध आहे. त्यानुसारच आताही हौशी कार्यकर्त्यांनी पैंजा लावल्या आहेत. पण राजकीय आखाड्यात कोण चितपट होणार आणि कोण मैदान मारणार? हे 4 जूनलाच स्पष्ट होणार आहे.