लोकसभा निवडणुकीच्या पाचव्या टप्प्यातील १३ जागांसाठी आज महाराष्ट्रात मतदान पार पडत आहे. यामध्ये मुंबईतील ६ लोकसभा मतदारसंघांचा समावेश आहे. मात्र, सर्वांचंच लक्ष कल्याण लोकसभा मतदारसंघाकडे लागून राहिलं आहे. या मतदारसंघातून मुख्यमंत्री एकनाथ शिंदे यांचे चिरंजीव श्रीकांत शिंदे तिसऱ्यांदा निवडणूक लढवत आहेत. त्यांच्याविरोधात शिवसेना ठाकरे गटाने वैशाली दरेकर यांना निवडणुकीच्या रिंगणात उतरवलं आहे.

दरम्यान, डॉ. श्रीकांत शिंदे (Shrikant Shinde) कल्याणमधून विजयाची हॅट्रिक करणार, त्याचा रेकॉर्ड ब्रेक मतांनी विजय होणार, असा विश्वास मुख्यमंत्री एकनाथ शिंदे यांनी व्यक्त केला. श्रीकांत शिंदे यांनी कल्याण लोकसभा मतदारसंघात चांगलं काम केलं असून मतदार त्यांना नक्कीच पसंती देणार, असंही मुख्यमंत्री शिंदे म्हणाले.

मुख्यमंत्री एकनाथ शिंदे (Eknath Shinde) यांनी ठाणे लोकसभा मतदारसंघात मतदानाचा हक्क बजावला. यानंतर त्यांनी माध्यमांसोबत संवाद साधला. मतदान केल्यानंतर मुख्यमंत्री शिंदे म्हणाले, "श्रीकांत शिंदे यांनी केलेले काम लोकांसमोर आहे. या मतदारसंघात त्यांनी चांगली विकासकामे केलेली आहेत".

"त्यामुळे मतदारांनी ही निवडणूक आपल्या हातात घेतली आहे. मला असे वाटते, की श्रीकांत शिंदे विजयाची हॅट्रिक करतील. ते रेकॉर्ड ब्रेक मतांनी विजयी होतील. मी मतदारांना आवाहन करतो की, लोकशाहीच्या उत्सवात त्यांनी सहभागी होऊन भरभरून मतदान करावं"

"मतदान करणे आपला प्रत्येकाचा अधिकार आहे. आपलं एक मत देशाला बदलू शकतं, महाशक्तीकडे नेऊ शकतं. मी बघतोय की पंतप्रधान नरेंद्र मोदी यांना तिसऱ्यांदा सत्तेत आणण्यासाठी मोठ्या संख्येने लोक घराबाहेर पडून मतदान करत आहेत. त्यामुळे आमचा विजय निश्चित आहे", असंही मुख्यमंत्री एकनाथ शिंदे म्हणाले.