जांभई येणं ही सामान्य गोष्ट आहे. थकवा, कंटाळा किंवा झोप येतेय याचं चिन्ह म्हणून जांभई देतो. मात्र, सतत जांभया येत असतील तर हे शरीरात काहीतरी बिघडल्याचं संकेत असू शकतं. डॉक्टरांच्या मते, जांभईचं थेट नातं मेंदू, हृदय आणि शरीरातील ऑक्सिजनशी जोडलेलं आहे. सामान्य प्रमाणात जांभई घेतल्याने मेंदू ताजातवाना राहतो, पण वारंवार जांभई येणं हे कमी झोपेच्या समस्या, झोपेचे विकार किंवा थकवा यांचं कारण असू शकतं.

झोप नीट न झाल्याने शरीर थकलेलं असतं आणि ते जागं राहण्यासाठी सतत जांभया येतात. मात्र, काही वेळा ही समस्या जास्त गंभीरही असू शकते. वारंवार जांभई येणं हृदयाच्या समस्या असल्याचे संकेत असू शकतं. मेंदू आणि हृदय यांचा संबंध 'वॅगस नर्व' नावाच्या मज्जातंतूने जोडलेला असतो. हृदयावर ताण आल्यास किंवा उत्तेजना वाढल्यास शरीरात जास्त जांभया येऊ शकतात.

डॉक्टर सांगतात की मेंदूचे आजार, जसे की एपिलेप्सी किंवा ट्युमर, यांमुळेही जांभईची पद्धत बदलू शकते. जर जांभईसोबत डोकेदुखी, एकाग्रतेचा अभाव किंवा स्मृती कमी होणं अशी लक्षणं दिसत असतील, तर मेंदूविषयक आजार असण्याची शक्यता नाकारता येत नाही. ऑक्सिजन आणि लोह (Iron) यांचा संबंध देखील यात महत्त्वाचा आहे. शरीरात लोह कमी झाल्यास रक्तात ऑक्सिजन कमी प्रमाणात पोहोचतो, त्यामुळे शरीर जांभई घेऊन जागं राहण्याचा प्रयत्न करतं. अशा अवस्थेत शरीराला थकवा जाणवतो आणि वारंवार जांभई येते.

हलकं चालणं किंवा स्ट्रेचिंग केल्यानेही शरीराला ऑक्सिजन मिळतो आणि झोपेचा दर्जा चांगला राहतो. जर सतत जांभया येत असतील, आणि त्यासोबत छातीत वेदना, चक्कर येणं, श्वास घ्यायला त्रास, किंवा अतिशय थकवा जाणवत असेल, तर त्वरित डॉक्टरांचा सल्ला घ्यावा. कारण ही केवळ साधी जांभई नसून, शरीरातील गंभीर आरोग्य समस्येची पहिली सूचना असू शकते