सध्याची तरुणाई नोकरीकडे फक्त एक करिअर म्हणून पाहत नाही, तर ती कुटुंबाचं आणि स्वतःच भविष्य सुरक्षित करण्याचं एक साधन म्हणून पाहतात. पण आपण काम करत असलेल्या ऑफिसच्या वातावरणात नैराश्य आणि तणावाचं वातावरण असेल तर त्याचा मानसिक आरोग्यावर वाईट परिणाम होतो. अशाच स्वरूपातील एका कर्मचाऱ्याची गोष्ट समोर आली आहे. ज्याने त्याच्या बॉस आणि एकंदरीत कंपनीच्या धोरणांना कंटाळून राजीनामा दिला जो आता इंटरनेटवर जोरदार व्हायरल होत आहे.

एका कंस्ट्रक्शन कंपनीने एका कर्मचाऱ्याचा रिझाईन लेटर शेअर केलं आहे. इन्स्टाग्रामवर त्याचे एक लाखापेक्षा जास्त फॉलोअर्स आहेत. AC Minza असं या कर्मचाऱ्याच नाव आहे. त्याने या रिझाईनमध्ये स्पष्ट लिहिलं आहे की, "सर, मी राजीनामा देत आहे कारण या कंपनीत फक्त टार्गेट वाढतं, पगार नाही. मी काम करतो, जादू नाही." या लेटरवर कंपनीचा अधिकृत स्टँप मारण्यात आला होता.

या कंस्ट्रक्शन कंपनीने रिझाईन लेटरला उत्तर देत म्हटले आहे की, "आम्हाला आज हे रिझाईन लेटर मिळालं. आम्हाला शंका आहे की ते विनोद म्हणून लिहिले गेलं आहे आणि सोशल मीडियावर पोस्ट केले गेलं आहे. कारण ते ऑफिस डायरीतील एका पानावर लिहिलेलं दिसतं, राजीनामा सहसा साध्या कागदावर लिहिला जातो किंवा ईमेलद्वारे पाठवले जातो." त्यांनी स्पष्ट केलं की ते त्याची सत्यता पडताळू शकत नाहीत.

ही पोस्ट काही तासांतच जोरदार व्हायरल झाली आणि त्याला नेटकऱ्यांचा चांगला प्रतिसाद मिळाला आहे. काही लोकांनी ती सेव्ह केली. तर काहींनी तरुणाचीच बाजू घेतली. "हा माणूस अगदी बरोबर आहे. जर पगार वाढत नसेल तर टार्गेट का वाढवायचे?" असं म्हटलं. तर "जर इन्क्रीमेंट होत नसेल तर टार्गेट वाढवणं निरर्थक आहे" असं देखील लोक म्हणत आहे.