प्रत्येकाच्या जीभेची चव वेगवेगळी असते. काही व्यक्तींना तिखट पदार्थ फार आवडतात तर काहींना गोड पदार्थ फार आवडतात. तसेच काहींना आंबट पदार्थ सुद्धा आवडतात. काही व्यक्ती अशाही असतात ज्यांना झणझणीत लवंगी मिरची आणि त्यापासून बनवलेली भजी खावीशी वाटतात. ही भजी घरच्याघरी कशी बनवावीत याची माहिती आज जाणून घेणार आहोत.

साहित्य

हिरवी मिरची

बेसन पीठ - २ वाटी

हळद - १ चमचा

मीठ - चवीनुसार

जीरे - २ चमचे

ओवा

पाणी

तेल

कृती

सर्वात आधी हिरव्या मिरच्या पाण्यात मस्त धुवून घ्या. मिरची धुवून झाल्यावर ती एका सुती कापडाने पुसून घ्या. त्यानंतर या मिरचीवर मध्यभागी चिरा पाडून घ्या. त्यानंतर त्यात अगदी चिमुटभर मीठ भरा. अशा पद्धतीने मिरचीत मीठ भरून ती एका बाजूला ठेवा. त्यानंतर तुम्हाला भजी बनवण्यासाठी बेसन पिठाचं मिश्रण बनवून घ्यावं लागेल.

बेसन पिठाचं मिश्रण बनवताना सर्वात आधी एका वाटीत बेसन पीठ घ्या. त्यामध्ये जीरे आणि ओवा मिक्स करा. जिरे आणि ओवा मिक्स केल्यावर यात थोडं थोडं पाणी मिक्स करून याचं घट्ट आणि पातळ असं मिश्रण तयार करा. त्यानंतर यामध्ये चविनुसार मीठ, हळद मिक्स करा. तसेच शेवटी या मिश्रणात थोडा खाण्याचा सोडा मिक्स करा. अशा पद्धतीने तयार झालं तुमचं बॅटर.

आता पुढे भजी तळताना सर्वात आधी गॅसवर तेल गरम करण्यासाठी ठेवा. तेल गरम होत असताना त्यात एक एक करून मिरची पिठात बुडवून घ्या. मिरची पिठात बुडवून तळून घ्या. मिरची तळत असताना गॅस लगेचच फास्ट करू नका. असे केल्याने पीठ जळून जाते आणि मिरची आतून कच्ची राहते. त्यामुळे मिरचीचे भजी तळताना ते मीडिअम टू लो फ्लेमवर तळून घ्या.