संजय गडदे, मुंबई

महाराष्ट्र गृहनिर्माण व क्षेत्रविकास प्राधिकरणाच्या (म्हाडा) मुंबई मंडळातर्फे मुंबईत 2030 घरांची जाहिरात काढण्यात आली आहे. जाहिरात आल्यानंतर अर्ज केव्हा भरायचा याबाबत नागरिकांच्या मनात उत्सुकता होती. अशात अर्ज भरण्याची तारीख आणि वेळ आजपासूनच सुरू होत आहे.

आज दुपारी १२ वाजल्यापासून म्हाडाच्या घरांसाठी ऑनलाईन अर्ज भरण्याची प्रक्रिया सुरू होणार आहे. मुंबईतील पहाडी गोरेगाव, अँटॉप हिल, वडाळा, कोपरी पवई, कन्नमवार नगर-विक्रोळी, शिवधाम मालाड या ठिकाणी ही घरे उपलब्ध असणार आहेत. मुंबईत हक्काचे घर घेऊ इच्छिणाऱ्यांसाठी ही सुवर्णसंधी म्हणावी लागेल.

मुंबई मंडळाच्या २०२४ च्या सोडतीत अत्यल्प उत्पन्न गटासाठी ३५९ सदनिका, अल्प उत्पन्न गटासाठी ६२७ सदनिका, मध्यम उत्पन्न गटासाठी ७६८ सदनिका, उच्च उत्पन्न गटासाठी २७६ सदनिका विक्रीसाठी उपलब्ध आहेत. त्यामुळे हे घर मिळवण्यासाठी तुम्ही आजपासूनच अर्ज भरण्यास सुरुवात करू शकता.

अर्ज कसा भरायचा?

IHLMS 2.0 या अँड्रॉइड ॲप प्ले स्टोअर आणि ॲप स्टोअरमधून डाऊनलोड करून म्हाडा लॉटरीसाठी सहभाग घेता येणार आहे.|

https://housing.mhada.gov.in या म्हाडाच्या अधिकृत संकेतस्थळावर देखील अर्ज नोंदणी, अर्ज भरणा व पेमेंट प्रक्रिया उपलब्ध करून देण्यात आली आहे. दुपारी बारा वाजल्यापासून ऑनलाईन पद्धतीने अर्ज भरण्यास सुरुवात होईल.

म्हाडाच्या अर्जाची किंमत किती आहे?

म्हाडाचा अर्ज करण्यासाठी तुम्हाला ५०० रुपये + जीएसटी @ १८% म्हणजे ९० रुपये, एकूण ५९० रुपये अर्ज शुल्क लागणार आहे. हा अर्ज शुल्क विना परतावा आहे.