किडनी ही शरीरातील एक मोठ्या अवयवांपैकी एक मानली जाते. किडनी ही पीएच बॅलन्सपासून ते मीठ, पोटॅशियम आणि इतर आवश्यक खनिजे नियंत्रित करण्याचं काम करते. मात्र चुकीची जीवनशैली, काही गंभीर आजार किंवा आनुवंशिक कारणांमुळे किडनीच्या आरोग्यावर परिणाम होतो किंवा त्याची कार्यक्षमता कमी होऊ शकते.

किडनी कमजोर झाली की, ती तुमच्या रक्ताला योग्य पद्धतीने फिल्टर करू शकत नाही. डायबिटीज आणि हाय ब्लड प्रेशर असलेल्या व्यक्तींना याचा धोका अधिक असतो. अनेकदा किडनीच्या समस्येची सुरुवातीची लक्षण खूप छोटी असतात. ती दिसायला किरकोळ वाटतात. मात्र अशी काही लक्षणं आहेत जी सकाळी बेडवरून उठल्यावर तुम्हाला लगेच दिसून येतात, ही लक्षणं कोणती आहेत ती पाहूयात.

सकाळी उठल्यावर चेहऱ्यावर सूज येणं

जर रोज सकाळी उठल्यावर चेहऱ्यावर सूज दिसत असेल, तर त्याकडे दुर्लक्ष करू नका. हे किडनी खराब झाल्याचे संकेत असू शकतात. मुख्य म्हणजे यावेळी पाय किंवा टाचांमध्येही सूज कायम राहते. तज्ज्ञांच्या म्हणण्यानुसार, हे फ्लुइड रिटेन्शनमुळे होतं. म्हणजेच किडनी रक्तातील अतिरिक्त पाणी योग्य प्रकारे बाहेर टाकू शकत नाही. यामुळे चेहरा आणि शरीराच्या इतर भागांमध्ये सूज येते.

लघवीमध्ये फेस दिसणं

सकाळी उठून तुम्ही लघवीला गेल्यावर जर त्यामध्ये फेस दिसला तर हेही किडनीच्या समस्येचं लक्षण असू शकतं. असं त्यावेळी होतं जेव्हा लघवीमध्ये जास्त प्रमाणात प्रोटीन असतं. याला प्रोटीन्युरिया म्हणतात. याचा अर्थ किडनी योग्य प्रकारे फिल्टरिंग करत नाहीये असा होतो.

त्वचा कोरडी होणं

किडनी कमजोर झाल्यावर शरीरात टॉक्सिन्स जमा होऊ लागतात. त्यामुळे स्वेट ग्लँड्स आकुंचन पावतात आणि त्वचा पटकन कोरडी होते. तज्ज्ञांनी सांगितलं की, जेव्हा त्वचेला जास्त प्रमाणात खाज येते आणि मॉइश्चरायझर लावूनही त्रास कमी होत नाही त्यावेळी हे युरेमिक प्रुरिटसचे लक्षण असते, जे किडनी डॅमेजचे मोठे संकेत आहे.

ब्रेन फॉग

किडनी योग्य प्रकारे काम करत नसल्यास रक्तात टॉक्सिन्स वाढतात. त्यामुळे थकवा, सुस्ती आणि लक्ष केंद्रित करण्यात अडचण येते. दीर्घकाळ अशी स्थिती राहिल्यास अ‍ॅनिमिया होऊ शकतो, ज्यामुळे मेंदूपर्यंत ऑक्सिजन कमी पोहोचतो आणि ब्रेन फॉग वाढतो.

श्वासाला दुर्गंधी येणं

कधी कधी सकाळी आपल्या श्वासाला अधिक प्रमाणात दुर्गंधी येते. पण जर ही दुर्गंधी सतत राहिली तर हे किडनीच्या समस्येकडे इशारा असू शकतो. किडनी योग्य प्रकारे काम करत नसल्यास शरीरात जमा झालेले टॉक्सिन्स श्वासाद्वारे बाहेर पडतात. याला युरेमिक ब्रीथ म्हणतात.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.