आपल्या शरीरातील महत्त्वाच्या अवयवांपैकी एक म्हणजे लिव्हर. लिव्हरच्या कार्यात कोणतेही अडथळे आले तर व्यक्तीला गंभीर आजार होण्याची शक्यता असते. आजकाल चुकीच्या जीवनशैलीमुळे अनेकांना लिव्हरसंबंधीच्या आजारांचा सामना करावा लागतो. यामध्ये लिव्हर इन्फेक्शन ही सर्वात मोठी समस्या मानली जाते.

लिवर इन्फेक्शन म्हणजे काय?

ज्यावेळी एखादा व्हायरस किंवा जीवाणू लिव्हरमध्ये प्रवेश करते आणि त्याला इन्फेक्टेड करतो तेव्हा तुमच्या लिव्हरला सूज येते. यालाच लिव्हरचं इन्फेक्शन म्हटलं जातं. जर अशी परिस्थिती उद्भवल्यास रूग्णाने वेळेत उपचार घेतले नाही तर त्याला हेपेटायटिस, सिरोसिस, लिव्हर फेल होणं अशा गंभीर आजारांचा सामना करावा लागू शकतो.

लिव्हरच्या इन्फेक्शनची कोणती लक्षणं दिसून येतात?

एखाद्या व्यक्तीला लिव्हरमध्ये इन्फेक्शन झाल्यास त्याला विविध प्रकारची लक्षणं दिसून येतात. यामध्ये संबंधित व्यक्तीला भूक न लागणं, उलटी होणं, थकवा तसंच पोटदुखी ही सर्वात सामान्य लक्षणं आहेत. जर लिव्हर इन्फेक्शन झालं असेल तर रूग्णाला शरीराच्या काही भागांमध्ये वेदनाही जाणवू लागतात.

तज्ज्ञांच्या सांगण्यानुसार, जर एखाद्या व्यक्तीला पोटाच्या वरच्या भागात तीव्र वेदना होत असतील तर हे लिव्हरच्या इन्फेक्शनचं सामान्य लक्षण आहे. यावेळी या वेदना उजव्या खांद्यापासून ते पाठीच्या मधल्या भागांपर्यं पोहोचू शकतात.

लिव्हर इन्फेक्शनची इतर कोणती लक्षणं दिसून येतात?

• पोटात सूज

• उलटी आणि मळमळ

• भूक कमी लागणं

• वजन सतत कमी होणं

• त्वचा आणि डोळ्यांचा पिवळसरपणा

• थकवा आणि अशक्तपणा

• पिवळसर रंगाचा मूत्र

• पाय आणि टाचांमध्ये सूज

• त्वचेवर पुरळ आणि खाज

डॉक्टरांची मदत कधी घ्यावी?

जर तुम्हाला बऱ्याच काळापासून पोटाच्या वरच्या भागात वेदना जाणवत असेल तर याकडे दुर्लक्ष करणं महागात पडू शकतं. लिव्हर इन्फेक्शनमुळे पोटात सूज येऊ शकते आणि त्यासोबत उलटी, भूक न लागणं यांसारखी लक्षणंही तुम्हाला दिसून येतात. त्यामुळे अशी समस्या दिसल्यास वेळीच उपचार करणं फायद्याचं ठरतं.

डिस्क्लेमर : वरील माहिती आम्ही फक्त वाचक-प्रेक्षकांना देत आहोत. आम्ही याचं समर्थन अथवा दावा करत नाही. कोणतेही उपचार, डाएट आणि औषधं तज्ज्ञांच्या सल्ल्यानंच घ्यावीत.