तुम्ही यापूर्वी ऐकलं असेल की, दात आणि हिरड्यांची नीट स्वच्छता न राखल्यास दातात कीड लागते किंवा पोकळी तयार होते. पण तुम्हाला माहितीये का, की तोंडाची अस्वच्छता थेट हृदयाच्या आरोग्यावरही परिणाम करू शकते? नुकत्याच झालेल्या एका संशोधनातून धक्कादायक निष्कर्ष समोर आला आहे.

या संशोधनानुसार, जर आपण रोज योग्य पद्धतीने तोंडाची स्वच्छता केली नाही, तर हृदयविकाराचा झटका येण्याचा धोका अनेक पटींनी वाढतो. त्यामुळे मुखाची स्वच्छता ठेवणं फार गरजेचं आहे.

संशोधनातून काय निष्पन्न झालं?

नव्या अभ्यासानुसार, ज्या व्यक्ती त्यांच्या तोंडाची स्वच्छता नीट ठेवत नाही नाहीत. म्हणजेच योग्यरित्या दात घासत नाहीत किंवा तोंड स्वच्छ ठेवत नाहीत त्यांच्या रक्तात जंतूंची संख्या वाढते. हे जंतू रक्तवाहिन्यांत साचून हळूहळू हृदयापर्यंत पोहोचतात.

हृदयरोगतज्ज्ञ डॉ. रमाकांत पांडा यांच्या मते, रक्तामध्ये जंतूंची संख्या वाढली की अनेक समस्या शकतात –

• दात व हिरड्यांमध्ये सड किंवा संसर्ग होऊ शकतो.

• या संसर्गामुळे इन्फ्लमेशन वाढते.

• दीर्घकाळ या स्थितीकडे दुर्लक्ष केल्यास हृदयविकार होण्याची शक्यता वाढते.

तोंडाची स्वच्छता आणि हृदयाचं आरोग्य यांचा संबंध कसा?

जंतुसंसर्ग – तोंडात वाढलेले घातक जंतू रक्तप्रवाहात मिसळतात.

प्लाक तयार होणं – हे जंतू रक्तवाहिन्यांत चिकट पदार्थ तयार करतात.

रक्तप्रवाहात अडथळा – प्लाक साचल्याने धमन्या हळूहळू अरुंद होतात.

हृदयविकाराचा झटका – धमन्यांमध्ये जास्त प्रमाणात अडथळा निर्माण झाल्यास हृदयविकाराचा झटका येऊ शकतो.

हृदयविकारापासून बचावासाठी काय करावे?

• दिवसातून किमान दोनदा नीट दात घासले पाहिजेत.

• दातांच्या फटींमध्ये अडकलेले अन्नकण योग्य पद्धतीने साफ करावेत.

• वर्षातून किमान दोनदा दंतवैद्याकडून तपासणी करून घ्यावी.

• जंक फूड, जास्त गोड पदार्थ यांचं सेवन टाळावं.