HIV हा एक असा व्हायरस आहे जो शरीराला हळूहळू आतून कमकुवत करत जातो. अनेकांना वाटतं की हा आजार फक्त असुरक्षित लैंगिक संबंधांमुळे होतो, पण खरं तर यापेक्षा अधिक गंभीर आहे आणि समाजात याबाबत जागरूकतेची खूप गरज आहे. आजही आपल्या समाजात HIV/AIDS बाबत अनेक गैरसमज आहेत.

अनेक जण याला केवळ लैंगिक संबंधांशी जोडलेली गोष्ट समजतात, पण काही अगदी सामान्य वाटणाऱ्या सवयीही या विषाणूच्या प्रसाराचं कारण ठरू शकतात. तज्ज्ञांच्या मते, HIV केवळ लैंगिक संबंधांमुळे पसरतो असं नाही. संक्रमित रक्त, एकाच सुईचा वापर किंवा वैयक्तिक वस्तूंचा इतरांनी वापर केल्यामुळेही हा आजार होऊ शकतो.

संक्रमित रक्त

जर रक्त चढवण्याआधी HIV ची तपासणी केली गेली नाही तर विषाणू थेट शरीरात जाऊ शकतो. विशेषतः गावांमध्ये किंवा अप्रमाणित वैद्यकीय सुविधांमध्ये याचा धोका अधिक असतो.

सुई किंवा इंजेक्शनचा वापर

ड्रग्ज घेणारे किंवा एखाद्या आजारामुळे सतत इंजेक्शन घेणारे जर एकाच सुईचा वापर करत असतील तर HIV झपाट्याने पसरू शकतो.

संक्रमित व्यक्तीच्या वैयक्तिक वस्तूंचा वापर

रेझर, ब्लेड, टूथब्रश अशा वस्तूंवर जर संक्रमित व्यक्तीच्या रक्ताचे अंश असतील आणि त्या जर दुसऱ्याने वापरल्या, तर ही समस्या होण्याचा धोका असतो.

गर्भावस्था

जर एखादी महिला HIV पॉझिटिव्ह असेल आणि तिच्यावर उपचार सुरू नसतील तर गर्भात किंवा स्तनपानादरम्यान बाळालाही हा व्हायरस होऊ शकतो.

HIV पॉझिटिव्ह व्यक्तींनी कोणत्या गोष्टींची काळजी घ्यावी?

• आपल्या वैयक्तिक वस्तू इतरांबरोबर कधीच शेअर करू नयेत.

• नेहमी संरक्षित लैंगिक संबंध ठेवावेत.

• डॉक्टरांनी दिलेली औषधं वेळेवर घ्यावीत, अँटीरेट्रोव्हायरल थेरपी नियमितपणे घ्यावी.

• HIV पॉझिटिव्ह व्यक्तींनी कधीच रक्तदान करू नये.