निरोगी आतडे केवळ पचनास मदत करत नाही तर एखाद्याच्या प्रजनन आरोग्यातही महत्त्वाची भूमिका बजावतात. आतडे निरोगी नसल्यास इस्ट्रोजनचं असंतुलन आणि प्रजनन समस्यांची शक्यता वाढते. आतडे आणि प्रजनन क्षमता यांच्यात एक संबंध आहे.

चेंबूरमधील नोवा आयव्हीएफ फर्टिलिटीच्या वंधत्व निवारण तज्ज्ञ डॉ. सौम्या शेट्टी यांनी सांगितलं की, विविध अभ्यासांनुसार, आतड्यांचं आरोग्य हे हार्मोन संतुलन चांगलं राखणं, जळजळ रोखणं आणि पोषक तत्वांचं शोषण करण्यास मदत करतं जे प्रजनन आरोग्यासाठी महत्वाच आहे. तुम्ही नैसर्गिकरित्या गर्भधारणा करण्याचा प्रयत्न करत असाल किंवा आयव्हीएफ सारख्या प्रजनन उपचारांचा अवलंब करत असाल तर तुम्हाला तुमच्या आतड्यांच्या आरोग्यावर लक्ष केंद्रित करण गरजेचं आहे.

आतडे आणि प्रजनन क्षमता यांच्यातील संबंध

आपल्या आतड्यात असे बॅक्टेरिया असतात जे अन्नाचे पचन होण्यास, पोषक तत्वे शोषण्यास आणि रोगप्रतिकारक शक्ती वाढविण्यास मदत करतात. या जीवाणूंच्या गटाला आतड्यांचा मायक्रोबायोम असे म्हणतात. जेव्हा तुमचे आतडे निरोगी असतात, तेव्हा ते स्त्रियांमध्ये ओव्हुलेशन आणि नियमित मासिक पाळीसाठी आवश्यक असलेल्या इस्ट्रोजेन आणि प्रोजेस्टेरॉन सारख्या हार्मोन्सचे योग्य संतुलन राखण्यास मदत करते आणि पुरुषांमध्ये शुक्राणूंची निर्मितीस देखील फायदेशीर ठरते.

कोणत्या कारणांमुळे आतड्यांचं आरोग्य बिघडतं?

आहाराच्या चुकीच्या सवयी, अँटीबायोटिक्स किंवा झोपेच्या कमतरतेमुळे आतड्यांचं आरोग्य बिघडतं. आतड्यांची जळजळ गर्भाशयाच्या अस्तरावर परिणाम करू शकते, ज्यामुळे गर्भाचं रोपण करणं कठीण होतं. हार्मोनल असंतुलनामुळे मासिक पाळी अनियमित होऊ शकते, पॉलीसिस्टिक ओव्हरी सिंड्रोम (पीसीओएस) किंवा शुक्राणूंची संख्या कमी होऊ शकते आणि एखाद्याच्या प्रजनन क्षमतेला हानी पोहोचू शकते. त्यामुळे विलंब न करता आतड्याची काळजी घेणं गरजेचं आहे.

आतड्यांचे आरोग्य सुधारण्यासाठी आणि प्रजनन क्षमता वाढवण्यासाठी टिप्स: एखाद्याने फायबरयुक्त पदार्थांचे सेवन करावे. तुमच्या आहारात फळे, भाज्या, तृणधान्य आणि शेंगांचा समावेश करावा. आंबवलेल्या पदार्थांचा आहारात समावेळ करा जामध्ये चांगले बॅक्टेरिया असतात. प्रक्रिया केलेले आणि शर्करायुक्त पदार्थ खाल्ल्याने आतड्यातील चांगले बॅक्टेरिया खराब होऊ शकतात आणि जळजळ वाढू शकते.

काय काळजी घ्याल?

संतुलित आहाराचं सेवन करणं, किमान २-३ लिटर पाणी पिणं आणि पुरेशी झोप घेणं गरजेचं आहे. कारण झोपेचा अभाव आणि जास्त ताण आतड्यांचं संतुलन बिघडू शकतं. आतड्यांची हालचाल वाढवण्यासाठी आणि जळजळ कमी करण्यासाठी दररोज व्यायाम करणं देखील फायदेशीर आहे.

पोटफुगी, गॅस, अपचन, बद्धकोष्ठता किंवा अतिसार, हार्मोनल असंतुलन ज्यामुळे अनियमित मासिक पाळी किंवा मासिक पाळीदरम्यान जास्त रक्तस्राव यासारख्या लक्षणांकडे दुर्लक्ष करू नका. आतड्यांची योग्य काळजी घेतल्याने केवळ पचन आणि पोटाच्या समस्याच कमी होतील असे नाही तर वंध्यत्वांसारखी समस्या देखील दूर होण्यास मदत होईल.