आपल्यापैकी अनेकजण हे कॉफीचे चाहते असतील. काहींचा दिवसही कॉफीशिवाय सुरु होत नाही. कॉफी ही जगभरात सर्वाधिक प्यायलं जाणाऱ्या ड्रिंकपैकी एक आहे. सकाळची सुरुवात, ऑफिसमध्ये काम करताना किंवा मित्रांबरोबर कॉफी डेट हे आपल्या लाइफस्टाइलचा एक महत्त्वाचा भाग बनलीये. मात्र याच कॉफीसोबत एक गोष्ट सध्या सोशल मीडियावर व्हायरल होताना दिसतेय.

सोशल मीडियावरचा व्हायरल दावा

नुकतंच सोशल मीडियावर एक व्हायरल व्हिडिओ पाहायला मिळतोय. या व्हिडीओमध्ये सांगण्यात आलंय की, कॉफीमध्ये १०% पर्यंत कॉकरोच म्हणजेच झुरळाचे छोटे अवशेष असू शकतात. व्हिडिओमध्ये असंही म्हटलंय, की हे FDA च्या नियमांनुसार सुरक्षित आहे.

FDA चं मत काय आहे?

अमेरिकेच्या FDA नुसार, कॉफीमध्ये छोट्या कीटकाचे अवशेष असणं सामान्य आहे. जर हे अवशेष मानक मर्यादेच्या आत असतील, तर ते खाद्यसुरक्षेसाठी स्वीकार्य आहेत. मुळात कॉफी बीन्सच्या साठवणूक आणि पॅकेजिंगच्या प्रक्रियेदरम्यान छोट्या कीटकांचे अवशेष सहज मिसळू शकतात. यावेळी त्यांना कॉफीतून पूर्णपणे काढून टाकणं फारच कठीण असतं. म्हणून हा प्रकार सामान्य मानला जातो.

१०% पर्यंत अवशेष म्हणजे काय?

काही रिपोर्ट्समध्ये असा दावा करण्यात आला आहे की, कॉफीमध्ये १०% पर्यंत झुरळाचे अवशेष असू शकतात. तरीही, हे प्रमाण FDAच्या नियमांमध्ये येतं, त्यामुळे ते सुरक्षित आहे.

सोशल मीडियावर पसरलेली अफवा की सत्य?

सोशल मीडियावर व्हायरल झाल्याने ही बाब तुम्ही हादरवणारी वाटू शकते. मात्र तज्ज्ञ सांगतात की, छोटे अवशेष आरोग्यास धोका पोहोचवत नाहीत. मुख्य म्हणजे उद्योगामध्ये हे सामान्य मानलं जातं.

पॅक्ड कॉफी आणि ग्राउंड कॉफीतील फरक काय?

कॉफी बीन्ससह येणाऱ्या कॉफीमध्ये हे अवशेष कमी आढळतात. तर ग्राउंड किंवा इंस्टंट कॉफीमध्ये याचं प्रमाण अधिक दिसू शकतं. उत्पादन प्रक्रियेमध्ये कीटक अवशेष मिसळू शकतात, म्हणून फरक असतो. मुळात आपण कॉफीची खरेदी करताना हे समजून घेतलं पाहिजे की, कॉफीमध्ये छोटे कीटक अवशेष असणं सामान्य आहे. योग्य सुरक्षा उपाय आणि नियमांनुसार हे आरोग्यासाठी हानिकारक नाहीत.