वय वाढत असताना सांध्यांची दुखणी वाढत जातात. ही सामान्य गोष्ट मानली जाते. पण, फक्त गुडघेच नाही तर हाताच्या अंगठ्यातल्या वेदनाही गंभीर आजाराचं लक्षण असू शकतात. असं तज्ज्ञ म्हणतात. बऱ्याचदा लोक अंगठ्यातचं किरकोळ दुखणं किंवा अस्वस्थता थकवा म्हणून दुर्लक्षित करतात, पण हेच पुढे जाऊन संधिवाताचे (आर्थरायटिस) चं लक्षण ठरू शकतं.

तज्ज्ञांच्या मते, हातातले कार्पोमेटाकार्पल जॉइंट (CMCJ) हा भाग आर्थरायटिसमुळे जास्त प्रभावित होतो. हा सांधा अंगठ्याच्या खूप तळाशी, मनगटाजवळ असतो. वस्तू घट्ट पकडणं, मोबाइल वापरणं किंवा लहानसहान कामं करणं यासाठी हा सांधा महत्त्वाचा असतो. पण या सांध्यातले कार्टिलेज हळूहळू घासलं जातं तेव्हा काही गंभीर समस्या निर्माण व्हायला सुरुवात होते.

तुम्ही या आजाराची ओळख घरच्या घरीही करु शकता. यासाठी अंगठा आणि तर्जनी एकत्र आणून चिमटी बनवण्याची साधी टेस्ट करायची असते. या प्रक्रियेदरम्यान अंगठ्याच्या खालच्या सांध्यात तीव्र वेदना, टोचल्यासारखं जाणवणं किंवा दाब जाणवत असेल, तर ते कार्टिलेज खराब होत असल्याचे संकेत दिसतात. तसेच काही इतर लक्षणांकडेही लक्ष देणं गरजेचं आहे. त्यासाठी सांध्यांभोवती सूज किंवा लालसरपणा दिसतो, सकाळी उठल्यावर सांधे आखडल्यासारखे वाटतात, हाताची पकड कमकुवत होते आणि चहाचा कप किंवा पुस्तक उचलताना त्रास होतो ही लक्षणं दुर्लक्षित करता कामा नयेत.

तज्ज्ञांच्या मते, सुरुवातीच्या टप्प्यात फिजिओथेरपी आणि काही खास व्यायामांच्या मदतीने हा त्रास कमी करता येऊ शकतो. तसेच, सांध्यांवरचा ताण कमी करण्यासाठी योग्य पद्धतीने वस्तू पकडण्याची सवय लावणंही गरजेचं आहे. पण तुमच्या हाताच्या वेदना कायम राहिल्या असतील तर लगेचच डॉक्टरांचा सल्ला घेणं महत्त्वाचं आहे.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.