सध्याच्या धावपळीच्या जीवनशैलीमुळे अनेकांच्या सवयींमध्ये मोठ्या प्रमाणात बदल झाले आहेत. त्यामध्ये खाण्यापिण्याच्या सवयींमध्ये, झोपेच्या वेळेत आणि व्यायाम न करणं अशी जीवनशैली अनेकजण जगत आहेत. पण यासगळ्यामुळे तुम्हाला अनेक समस्यांना सामोरं जावं लागू शकतं.

तज्ज्ञांच्या मते तुम्हाला सामान्य वाटणाऱ्या चुका भविष्यात प्री- डायबेटीज या आजाराला निमंत्रण देतात. तुम्ही अशावेळेस सावध राहून तुमच्या शरीरातल्या अचानक होणाऱ्या बदलांकडे लक्ष देणं गरजेचं आहे. कारण जेव्हा प्री- डायबेटीजची लागण होते, तेव्हा सुरुवातीच्या टप्प्यात कोणतीच ठळक लक्षणं जाणवत नाहीत. चला जाणून घेऊयात प्री- डायबेटीजची सुरुवातीची लक्षणे.

१.सतत तहान लागणे.

सतत तहान लागणं ही सामान्य समस्या आहे. त्यात उन्हाळ्यात ही समस्या जाणवतेचं. पण त्यासोबत सतत लघवी होणं ही समस्या असेल तर तुम्ही प्री-डायबिटीजची तपासणी केली पाहिजे. यामध्ये शरीरातल्या साखरेचं प्रमाण वाढतं. त्यामुळे मूत्रपिंडांवर जास्तीचा ताण येतो.

२. थकवा जाणवणे

पुरेशी झोप घेतल्यानंतरही दिवसभर थकवा जाणवत असेल तर ते सुद्धा धोक्याचं लक्षण असू शकतं. यामध्ये जेव्हा शरीराला ऊर्जा मिळण्यासाठी ग्लुकोज योग्य प्रकारे वापरता येत नाही तेव्हा अशक्तपणा आणि आळस मोठ्या प्रमाणात वाढतो.

३. धूसर दिसणे

तुम्हाला जर अचानक जवळचं किंवा लांबचं धूसर दिसत असेल तर हे प्री-डायबेटीजचं लक्षण असू शकतं. यामध्ये रक्तातल्या साखरेच्या पातळीत सतत बदल झाल्यावर डोळ्यांच्या लेन्सवर परिणाम होतो आणि दिसण्यात अडचणी निर्माण होतात. याशिवाय हात-पायांमध्ये मुंग्या येतात, जळजळ होते किंवा बधिरपणा जाणवतो. त्यामुळे ही लक्षणे अजिबात दुर्लक्षित करू नका.

टीप : वरील माहिती आम्ही फक्त वाचक-प्रेक्षकांपर्यंत पोहचवत आहोत. याचं समर्थन अथवा दावा करत नाही. त्यामुळे कोणतेही उपचार, डाएट आणि औषधं तज्ज्ञांच्या सल्ल्यानं घ्यावीत.