सध्या लोक बॅंकेत जाण्यापेक्षा एटीएमने पैसे काढणं पसंत करतात. कारण ही प्रोसेस फक्त काही सेंकदाची असते. पण बऱ्याचवेळेस व्यवहार पूर्ण झाल्यानंतर सुद्धा डेबिट कार्ड मशीनमध्ये अडकते. अशा वेळी घाबरून गोंधळून न जाता योग्य काम केलं पाहिजे.

एटीएममध्ये कार्ड का अडकतं?

ATM मशीनच्या सॉफ्टवेअरमध्ये कधीकधी बिघाड, इंटरनेट कनेक्शन खंडित झाल्यामुळे किंवा अचानक वीज जाणं यामुळे कार्ड मशीनमध्ये अडकू शकतं. तसेच तुम्ही सतत चुकीचा पिन टाकल्यात असाल तरीही कार्ड अडकू शकतं.

कार्ड अडकल्यानंतर घाबरून जाऊ नका

कार्ड अडकल्यावर काही लोक घाईगडबडीत चुकीची कृती करतात. तेव्हा तुम्ही कार्ड स्लॉटमध्ये बोट, पिन किंवा कोणतीही टोकदार वस्तू घालू नका. असं केल्यावर कार्ड तुटू शकतं किंवा मशीनचं नुकसान होऊ शकते.

बँकेच्या कस्टमर केअरशी संपर्क साधा

सर्वात आधी कार्ड अडकल्यावर बँकेच्या ग्राहक सेवा केंद्राला फोन करा. एटीएमचं ठिकाण, वेळ आणि मशीनवरील ATM ID क्रमांकाची माहिती अधिकाऱ्यांना सांगा. यामुळे तक्रारीची प्रक्रिया वेगाने पूर्ण होईल.

डेबिट कार्ड लगेच ब्लॉक करा

सुरक्षेच्या दृष्टीने कार्ड लगेचच ब्लॉक (Hotlist) करणं खूप गरजेचं आहे. मोबाईल बँकिंग अॅप किंवा कस्टमर केअरच्या मदतीने कार्ड बंद केल्यावर त्याचा गैरवापर होण्याचा धोका पूर्णपणे टळू शकतो.

नवीन कार्डसाठी अर्ज करण्याचा पर्याय उपलब्ध

बऱ्याचदा बँका या अडकलेले कार्ड कायमचं रद्द करून नवीन डेबिट कार्ड देण्याचा ऑप्शन देतात. जवळपास 7 ते 10 कामकाजाच्या दिवसांत नवीन कार्ड ग्राहकाच्या पत्त्यावर पाठवलं जातं. त्यामुळे खातं सुद्धा सुरक्षित राहतं.