सनी देओल आणि वरुण धवन यांचा गाजणारा ‘बॉर्डर 2’ सध्या चित्रपटगृहांमध्ये प्रचंड यश मिळवत आहे. २३ जानेवारी २०२६ रोजी प्रदर्शित झालेल्या या चित्रपटाने अवघ्या काही दिवसांतच प्रेक्षकांची मनं जिंकली आहेत.

देशभरात थिएटरमध्ये ‘बॉर्डर 2’ पाहण्यासाठी प्रेक्षकांची मोठी गर्दी पाहाला मिळाली. तसेच चित्रपट बॉक्स ऑफिसवर तुफान कमाई करत असल्याचं पाहायला मिळालं. दरम्यान, या चित्रपटाचे डिजिटल स्ट्रीमिंग हक्क Netflix ने खरेदी केले आहेत. अशी महत्त्वाची माहिती समोर आली आहे. मिळालेल्या माहितीनुसार, ‘बॉर्डर 2’ २० मार्च २०२६ रोजी नेटफ्लिक्सवर प्रदर्शित होण्याची दाट शक्यता आहे.

साधारणपणे चित्रपट प्रदर्शित झाल्यानंतर ८ आठवड्यांनी ओटीटीवर रिलीज होतो. त्याच नियमानुसार मार्चच्या तिसऱ्या आठवड्यात हा चित्रपट घरबसल्या पाहता येईल. निर्मात्यांकडून अद्याप अधिकृत घोषणा झालेली नसली, तरी ओटीटी रिलीजबाबत चाहत्यांमध्ये मोठी उत्सुकता आहे.

अनुराग सिंह दिग्दर्शित या चित्रपटात सनी देओल लेफ्टनंट कर्नल फतेह सिंह कलेर यांच्या भूमिकेत, तर वरुण धवन, दिलजीत दोसांझ आणि अहान शेट्टी यांच्या दमदार भूमिकेत पाहायला मिळाले आहेत.

बॉक्स ऑफिसबाबत बोलायचे झाले तर, ‘बॉर्डर 2’ हा २०२६ मधील बॉलिवूडचा पहिला ब्लॉकबस्टर ठरला असून, दोन आठवड्यांत २७५ कोटींचे बजेट वसूल करत जागतिक स्तरावर ३०० कोटींहून अधिक कमाई केली आहे.