गुरुवार,२८ नोव्हेंबर २०२४,कार्तिक कृष्णपक्ष,प्रदोष.
तिथी- त्रयोदशी (अहोरात्र)
रास-तुला
नक्षत्र-चित्रा
योग- सौभाग्य
करण-गरज
दिनविशेष- त्रयोदशी वर्ज्य
मेष - वैवाहिक जीवनात सौख्य आणि सुख दोन्हीही एकत्र मिळण्याचा आजचा दिवस आहे. कामाच्या ठिकाणी प्रगती होईल. लांबच्या प्रवासाचे नियोजन होईल.
वृषभ - मन थोडे सैरभैर राहील. "एक ना धड भाराभर चिंध्या" अशी कामे होतील. कदाचित तब्येतीच्या तक्रारी सुद्धा वाढतील. बाहेरचे खाणे टाळावे.
मिथुन - लॉटरी सट्टा यामध्ये आज फायदा आहे. पैशाची गुंतवणूक सुद्धा फायदेशीर ठरेल. व्यवहार सचोटीने आणि योग्य होतील. दिवस चांगला आहे.
कर्क -आईची आज विशेष काळजी घ्यावी लागेल. तिच्याविषयी प्रेम दाटून येईल. घरी पाहुण्यांचे आगमन होईल. त्यांच्या सरबराई मध्ये दिवस व्यस्त राहील.
सिंह - गगनाला भिडेल एवढी कामे आज असतील. दिवस छोटा वाटेल. इतरांनी केलेल्या आपल्या स्तुतीमुळे मन फुलून जाईल. छोटे प्रवास घडतील.
कन्या - वाणीवर एक प्रकारची वेगळीच मिठास राहील. लोकांना आपलेसे करण्यासाठी आजचा दिवस चांगला आहे. प्रेम पेरून आणि लोक हेरून कामे करा.
तूळ - आपली आभा उजळून निघणार आहे. आपले सुंदर व्यक्तिमत्व अजूनच फुलून येईल. मन सकारात्मक दिशेने धाव घेईल. स्वतःवर पैसा खर्च कराल.
वृश्चिक - "उगाचच इकडे आड तिकडे विहीर" असे होईल. नाहक कटकटी मागे लागतील. दुसऱ्याच्या सल्ल्याने वागावे लागेल जे आपल्याला मुळीच आवडत नाही. पण आज समजूतदारपणा वाढीस लागेल.
धनु - प्रेमामध्ये रंग फुलतील. पण आपल्या जोडीदाराचे ऐकावे लागेल. एकत्र भेटून गुजगोष्टी होतील. नात्याचा लाभ पदरात पडेल. दिवस चांगला आहे.
मकर- भाव आणि भावना यापेक्षा कर्माला प्राधान्य आपल्याकडून नेहमीच दिले जाते. आजही कर्म तुमच्या प्रगतीची साक्ष होतील. वाढीव कामे होतील. आणि तसाच मानही मिळेल.
कुंभ - प्रदोष आणि आपली रास याची सांगड छान आहे. शिव उपासना करा. आज फलदायी ठरेल. आज भावनेने नाही तर बुद्धीने काम करावे लागतील. भाग्याला कलाटणी मिळेल.
मीन - सहज असणाऱ्या गोष्टी अवघड होऊन बसतील. पण यातून तुम्हालाच मार्ग काढावा लागेल. नको त्या कटकटीत साध्या स्वभावामुळे अडकून राहाल. आणि बाहेर पडताना मृत्यूतुल्य यातना होतील.
ज्योतिषशास्त्री अंजली पोतदार