Famous Actor Death: तेलुगू चित्रपटसृष्टीतील ज्येष्ठ अभिनेते आणि निर्माते जी. व्ही. नारायण राव यांचे वयाच्या ७३व्या वर्षी निधन झाले. बुधवारी सायंकाळी त्यांनी अखेरचा श्वास घेतला. काही काळापासून ते प्रकृतीशी संबंधित समस्यांशी झुंज देत होते. त्यांच्या निधनाच्या वृत्ताने तेलुगू चित्रपटसृष्टीला मोठा धक्का बसला असून, अनेक कलाकार सोशल मीडियाच्या माध्यमातून त्यांना श्रद्धांजली अर्पण करत आहे. ‘मुव्ही आर्टिस्ट असोसिएशन’नेही त्यांच्या निधनाबद्दल शोक व्यक्त केला आहे.

जी. व्ही. नारायण राव यांचा जन्म कृष्णा जिल्ह्यातील कुरुमड्डाली गावात झाला. त्यांनी मद्रास फिल्म इन्स्टिट्यूटमधून अभिनयाचे प्रशिक्षण घेतले. १९७६ मध्ये दिग्गज दिग्दर्शक के. बालचंदर यांच्या ‘अंथुलेनी कथा’ या चित्रपटातून त्यांनी अभिनय क्षेत्रात पदार्पण केले. पहिल्याच चित्रपटातील प्रभावी अभिनयासाठी त्यांना सर्वोत्कृष्ट सहाय्यक अभिनेत्याचा नंदी पुरस्कार मिळाला. यानंतर त्यांनी ‘मुत्याला पल्लाकी’, ‘ओका ऊरी कथा’, ‘चिलकम्मा चेप्पिंडी’ आणि ‘ऊरुकिचिना माता’ यांसारख्या चित्रपटांमध्ये महत्त्वाच्या भूमिका साकारल्या. जवळपास पाच दशकांच्या कारकिर्दीत त्यांनी १०० हून अधिक चित्रपटांमध्ये काम केले.

चिरंजीवी आणि रजनीकांत यांच्याशी खास मैत्री

जी. व्ही. नारायण राव यांचे सुपरस्टार रजनीकांत यांच्याशी अत्यंत जवळचे संबंध होते. चेन्नईतील फिल्म इन्स्टिट्यूटमध्ये दोघे एकाच बॅचचे विद्यार्थी होते. अभिनयाचे प्रशिक्षण घेत असतानाच त्यांची मैत्री झाली. तेलुगू सुपरस्टार चिरंजीवी यांच्याशीही त्यांची घनिष्ठ मैत्री होती. दोघांनी ‘चट्टानिकी कल्लू लेवू’, ‘मंचू पल्लाकी’, ‘राजा विक्रमार्का’, ‘गँग लीडर’ आणि ‘हिटलर’ यांसारख्या चित्रपटांमध्ये एकत्र काम केले.

निर्माता म्हणूनही यशस्वी कारकीर्द

अभिनयासोबतच जी. व्ही. नारायण राव यांनी निर्मिती क्षेत्रातही उल्लेखनीय काम केले. त्यांनी चिरंजीवी यांच्या ‘देवान्तकुडू’ आणि ‘यमूडिकी मोगुडू’ या गाजलेल्या चित्रपटांची निर्मिती केली. ‘यमूडिकी मोगुडू’च्या तमिळ रिमेकची निर्मितीही त्यांनी केली होती. या चित्रपटात रजनीकांत यांनी प्रमुख भूमिका साकारली होती.

टेलिव्हिजन क्षेत्रातही ते सक्रिय होते. ‘पासुपू कुमकुमा’ आणि ‘सुंदरकांडा’ यांसारख्या मालिकांमध्ये त्यांनी महत्त्वपूर्ण भूमिका साकारल्या. अभिनय, निर्मिती आणि टेलिव्हिजन अशा विविध माध्यमांत योगदान देणाऱ्या जी. व्ही. नारायण राव यांच्या निधनाने तेलुगू मनोरंजनसृष्टीने एक अनुभवी कलाकार आणि निर्माता गमावला आहे.