'वीण दोघांतली ही तुटेना' मालिका ही प्रेक्षकांची आवडती आहे. या मालिकेला भरभरून प्रेम मिळत आहे. एकीकडे समर आणि स्वानंदीचे प्रेमाचे नाते फुलताना दिसत आहे. तर दुसरीकडे चिंगी गरोदर असल्याचे राजवाडेंच्या कुटुंबात सर्वांना समजते. सध्या मालिकेत अंशुमनचे लग्नाचा सीन पाहायला मिळत आहे. नुकताच 'वीण दोघांतली ही तुटेना' मालिकेचा नवीन प्रोमो समोर आला आहे. ज्यात स्वानंदीचा रुद्रावतार पाहायला मिळत आहे.

स्वानंदीला चिंगीचे मेडिकल रिपोर्ट्स सापडतात. जेव्हा ती सर्वांना चिंगी अंशुमनच्या मुलाची आई होणार असल्याचे सांगते तेव्हा अंशुमन हे सर्व खोटे असल्याचे बोलतो. स्वानंदी चिंगीला लग्न मंडपात घेऊन येते आणि अंशुमनचे लग्न थांबवते. आपल्या भावाचे असे कृत्य पाहून समीरला मोठा धक्का बसतो.

प्रोमोमध्ये नेमकं काय?

स्वानंदी अंशुमनच्या कानाखाली मारते. त्यानंतर समर म्हणतो, "तुला मी शेवटची संधी देतोय अंशुमन, आता तू माझ्याशी खरं बोललास ना...तर निदान मी तुझ्याशी माणूस म्हणून नीट वागेन. पण, जर तू ही जबाबदारी नाकारलीस आणि DNA टेस्टमध्ये हे मुल तुझेच असल्याचे समजले तर विषय संपला... या घराचे दरवाजे तुझ्यासाठी कायमचे बंद... यापुढे तुझे कोणाशीही कुठलेच नाते नसेल... "

समरचे ऐकल्यावर अंशुमन काय करणार हे पाहणे महत्त्वाचे ठरणार आहे. बाळाची जबाबदारी स्वीकारणार की DNA टेस्ट करणार? मालिकेने खूपच रंजक वळण घेतले आहे. या प्रोमोवर नेटकरी भरभरून कमेंट्सचा पाऊस पाडत आहे. 'वीण दोघांतली ही तुटेना' ही मालिका सायंकाळी ७:१५ वाजता झी मराठी वाहिनीवर पाहायला मिळते.