Entertainment News : मनोरंजनविश्वातून खळबळजनक बातमी समोर आली आहे. एका प्रसिद्ध टेलिव्हिजन अभिनेत्रीवर तिच्या पतीने चाकूने हल्ला केला आहे. या प्रकरणी पोलिसांनी अभिनेत्रीच्या पतीवर गुन्हा दाखल करत पुढील कारवाई केली आहे. पोलिसांनी हत्येच्या प्रयत्नाच्या आरोपांखाली अभिनेत्रीच्या पतीला अटक केली आहे.

मिळालेल्या माहितीनुसार, कन्नड टेलिव्हिजन अभिनेत्री श्रुती (जिचे मूळ नाव मंजुला आहे) हीच्यावर पती अमरीशने जीवघेणा हल्ला केला. ५ जुलै रोजी श्रुतीवर बंगळुरूमधील राहत्या घरी हल्ला झाला. आठवडाभराने ही घटना समोर आली आहे. आर्थिक समस्या आणि वैवाहिक स्थितीवरुन श्रुती आणि तिचा पती अमरीश यांच्यातील संबंध मागील काही महिन्यांपासून ताणले होते. दोघांनी एकमेकांच्या विरोधात पोलीस तक्रार दाखल केली होती.

सततच्या वादाला कंटाळून श्रुती एप्रिल महिन्यामध्ये तिच्या भावाच्या घरी राहायला गेली. त्यानंतर दोघांना तडजोड होऊन मागच्या आठवड्यात त्यांनी समेट केला. यादरम्यान श्रुतीवर अमरीशने प्राणघातक हल्ला केला. त्यांची मुले कॉलेजला गेल्यावर अमरीशने डाव साधला. अमरीशने श्रुतीच्या चेहऱ्यावर पेपर स्प्रे मारला आणि तिच्यावर चाकूने वार केले.

अमरिशने श्रुतीच्या मानेवर, छातीवर आणि मांडीवर चाकूने अनेकदा वार केले. यामुळे श्रुतीला गंभीर दुखापत झाली. अमरिशने श्रुतीचे केस ओढले आणि तिचे डोके भिंतीवर आपटले अशी माहिती समोर आली आहे. श्रुती सध्या बंगळुरूच्या व्हिक्टोरिया रुग्णालयात उपचार सुरु आहेत. तिने अमरीशवर हत्येचा प्रयत्न केल्याचा आरोप केला आहे. घरगुती हिंसा होत असल्याचेही श्रुतीने म्हटले आहे.

पत्नीवर जीवघेणा हल्ला केल्याप्रकरणी हनुमंतनगर पोलिसांनी अमरिशच्या विरोधात गुन्हा दाखल केला आहे. पोलिसांनी त्याला अटक केल्याची माहिती समोर आली आहे. या घटनेचा सविस्तर तपास सुरु असल्याचे पोलिसांनी सांगितले आहे. अभिनेत्री श्रुतीवर झालेल्या हल्ल्यामुळे सिनेसृष्टीमध्ये खळबळ उडाली आहे.