मुंबई : बॉलिवूडची प्रसिद्ध अभिनेत्री जी आता हॉलिवूडमध्ये डेब्यू करणार आहे ती म्हणजे आलिया भट्ट. अभिनेत्री आलिया भट्ट(Alia Bhatt) आता हॉलिवूडसोबतच निर्मिती क्षेत्रातही पदार्पण करणार आहे. आलिया भट्टच्या प्रोडक्शनचा पहिला चित्रपट 'डार्लिंग्स' नेटफ्लिक्सवर रीलीज होणार आहे. (Netfilx)नेटफ्लिक्स इंडियाने आज चित्रपटाचा फर्स्ट लूक आणि टीझर रिलीज केला आहे. त्याचवेळी आलियानेही तिच्या सोशल मीडिया हँडलवरून तिचा लूक आणि टीझर शेअर करून तिच्या लाखो चाहत्यांची मने जिंकली आहेत. टीझर शेअर करताना आलियाने कॅप्शनमध्ये लिहिले की, 'हा फक्त टीझर आहे डार्लिंग्स.. ५ ऑगस्ट रोजी येत आहे #डार्लिंग्ज ऑन नेटफ्लिक्स

'डार्लिंग्स' चित्रपटाचा टीझर एका मिनिटाचा आहे. पण निर्मात्यांनी आलिया भट्टपासून ते शेफाली शाह, विजय वर्मा आणि रोशन मॅथ्यूपर्यंत चित्रपटातील सर्व कलाकारांना खूप उत्तम प्रकारे सादर केले आहे.

टीझरच्या सुरुवातीला आलिया बेडूक आणि विंचवाची गोष्ट सांगत आहे. याच वेळी सर्व पात्रांची ओळख करून दिली जाते. टीझरच्या शेवटी आलिया-शेफाली पोलिसांसमोर एक खून झाल्याचे सांगतात. मात्र, आई आणि मुलीच्या बोलण्यात एवढा गोंधळ आहे की, पोलीस अधिकारीही गोंधळतात आणि त्याचं म्हणणं खोट ठरवतात.

बेडूक आणि विंचू कधी मित्र होऊ शकतात का?

टीझर व्यतिरिक्त नेटफ्लिक्स इंडियाने त्यांच्या सोशल मीडिया हँडलवरून पोस्ट केलेल्या पोस्टरमध्ये 'बेडूक आणि विंचू मित्र होऊ शकतात का? पाहा फक्त नेटफ्लिक्सवर डार्लिंग्ज, ५ ऑगस्ट अशी कॅप्शन लिहिली आहे

आलिया भट्ट 'डार्लिंग्स'मधून निर्माती क्षेत्रात नव्याने पदार्पण करणार आहे. जसमीत के. रीन दिग्दर्शित, शाहरुख खान आणि गौरी खानच्या रेड चिलीज एंटरटेन्मेंटसोबत आलिया भट्ट 'डार्लिंग्स'या चित्रपटाची प्रथमच निर्मिती करत आहे. हा एक डार्क कॉमेडी चित्रपट आहे. या चित्रपटाची कथा मुंबईत राहणाऱ्या आई-मुलीच्या नात्याभोवती फिरते. शेफाली शाह या चित्रपटात आलिया भट्टच्या आईची भूमिका साकारणार आहे.