Colors TV: कलर्स टीव्हीचा नवीन रिअ‍ॅलिटी शो 'पती पत्नी और पंगा' सध्या चर्चेत आहे. या शोमध्ये खऱ्या आयुष्यात पती पत्नी असलेले स्टार कपल्स दिसणार आहेत. या शोची सर्वत्र बरीच चर्चा आहे. लग्नापासून ग्लॅमर जगतापासून दूर असलेली स्वरा भास्कर पहिल्यांदाच तिचा राजकारणी पती फहाद अहमदसोबत दिसणार आहे. या शोचा प्रोमो रिलीज झाला असून स्वरा भास्कर ही तिच्या जोडीदारासोबत लग्न करून पचतावली असल्याचं म्हटलं आहे.

या बहुप्रतिक्षित रिअ‍ॅलिटी शोचे सूत्रसंचालन मुनावर फारुकी आणि सोनाली बेंद्रे करत आहेत. अविका गौर तिच्या होणाऱ्या नवऱ्यासोबत म्हणजेच मिलिंद चांदवानीसोबत या शोमध्ये सहभागी होत आहे. हिना खान तिचा पती रॉकी जयस्वालसोबत आणि गुरमीत चौधरी त्याची पत्नी देबिना बॅनर्जीसोबत दिसणार आहे. या सर्व जोडप्यांचे प्रोमो रिलीज झाले आहेत. स्वरा भास्कर आणि फहाद अहमदचा प्रोमो सर्वाधिक पसंत केला जात आहे.

काय आहे या प्रोमोमध्ये ?

स्वरा भास्कर आणि फहाद अहमदच्या प्रोमोमध्ये दोघेही ढोल वाजवताना दिसत आहेत. स्वरा ढोल वाजवत प्रवेश करते, त्यावर फहाद अहमद म्हणतो की या महिलेला ढोल खूप आवडतो. तिच्या लग्नाच्या वेळी तिने सरकारी कार्यालयात ढोल वाजवले होते. ज्यामुळे लग्न लावणाऱ्या अधिकाऱ्याची बदली झाली. पतीची तक्रार ऐकून स्वरा म्हणते की, हा तर भांडण करण्याच्या मूडमध्ये आहे आणि आता तिला वाटतंय की इथे येऊन तिने चूक केली. यावर फहाद म्हणतो, “तुम्ही लोक इथे मला शांत बसू देऊ नका.” अभिनेत्री पुन्हा म्हणते, ‘मी मोठी चूक केली.’ दरम्यान शो च्या प्रोमोवरून अभिनेत्री स्वरा भास्कर आणि तिचा खऱ्या आयुष्यातील पती फहाद अहमदच्या बऱ्याच चर्चा सोशल मीडियावर रंगल्या आहेत.

रुबिना अभिनवची केमिस्ट्री

नवीन प्रोमोमध्ये अभिनेत्री रुबीना दिलाइक आणि अभिनेता अभिनव शुक्ला देखील दिसत आहेत. दोघांमधील प्रेमळ गप्पा लोकांना आवडू लागल्या आहेत. मुनावर फारुकी अभिनवला विचारतो की "लग्नापूर्वी त्याच्याकडे किती पर्याय होते", ज्यावर रुबीना समर्पक उत्तर देते. या लोकप्रिय जोडप्याची अद्भुत केमिस्ट्री शोमध्ये आकर्षण वाढवत आहे.