Lock Upp 2: 'लॉक अप' (Lock Upp) या रिअॅलिटी शोच्या 'जजमेंट डे' भागात अनेक धक्कादायक घडामोडी पाहायला मिळाल्या. प्रकृती खालावल्यामुळे गोविंदाची पत्नी सुनीता आहुजा यांचा शोमधील प्रवास अखेर संपला. त्यांची प्रकृती लक्षात घेऊन सह-सूत्रसंचालक फराह खान आणि रितेश देशमुख यांनी त्यांना शोमधून बाहेर जाण्याची परवानगी दिली. विशेष म्हणजे, सुनीताला घेण्यासाठी स्वतः अभिनेता गोविंदा सेटवर पोहोचला होता.

शोदरम्यान सुनीता आहुजा भावूक झालेल्या दिसल्या. त्यांनी सांगितले की, मधुमेह नियंत्रणात नसल्याने आणि मेनोपॉज टप्प्यातून जात असल्यामुळे त्यांना शारीरिक व मानसिक त्रास सहन करावा लागत आहे. शरीरात तीव्र वेदना होत असून श्वास घेण्यासही अडचण येत असल्याने त्यांनी वारंवार शो सोडण्याची इच्छा व्यक्त केली होती.

शोमधून बाहेर आल्यानंतर गोविंदाने सुनीताला मिठी मारत तिची समजूत काढली. यावेळी त्याने हलक्याफुलक्या अंदाजात एक किस्साही सांगितला. "माझ्या मित्रांनी सुनीता शोमध्ये शिव्या देतानाचे अनेक व्हिडिओ मला पाठवले. पण काही हरकत नाही, मी ते सर्व सहन केले आहे," असे म्हणत गोविंदा म्हणाला. त्याचबरोबर सुनीता लहान मुलासारखी असून तिने यापूर्वी अशा कठीण परिस्थितीचा सामना कधीच केला नव्हता, असेही त्याने सांगितले.

दरम्यान, शोमध्ये सुनीताने कुटुंबाबद्दल केलेल्या वक्तव्यांवरूनही चर्चा रंगली होती. यावर फराह खान यांनी तिला या अनुभवातून काय शिकायला मिळाले, असा प्रश्न विचारला. त्यावेळी गोविंदाने हस्तक्षेप करत, "कुटुंबात जे काही घडले ते घरातच राहू द्या. मी माझ्या जवळच्या लोकांवर कायम प्रेम करत राहीन," असे स्पष्ट केले. काही वेळाने त्यांची मुलगी टीना आहुजाही सेटवर पोहोचली. आईला अशा अवस्थेत पाहून तिलाही अश्रू अनावर झाले.