येणाऱ्या दिवसांत मालिकांची बंपर मेजवानी प्रेक्षकांना पाहायला मिळणार आहे. स्टार प्रवाह वाहिनीने नुकताच एक प्रोमो शेअर केला आहे. ज्याने सर्वांचे लक्ष वेधून घेतले आहे. सध्या स्टार प्रवाहाच्या काही मालिकांमध्ये रंजक वळण पाहायला मिळत आहे. अनेक खुलासे मालिकांमध्ये होणार आहेत. या खुलाशांचा मोठा महासंगम पाहायला मिळणार आहे. येणाऱ्या आठवड्यात स्टार प्रवाहच्या सुपरहिट तीन मालिकांचा महासंगम पाहायला मिळेल.

मालिकांचा महासंगम हा विशेष भाग तब्बल दीड तासांचे असणार आहेत. त्यामुळे प्रेक्षकांचे भरपूर मनोरंजन होणार आहे. महासंगममध्ये 'ठरलं तर मग' (Tharla Tar Mag) , 'लक्ष्मीच्या पाऊलांनी' (Laxmichya Paulanni ) आणि 'थोडं तुझं आणि थोडं माझं' (Thod Tuz Ani Thod Maz ) या तीन मालिकांचा समावेश आहे. याचा खास प्रोमो शेअर करण्यात आला आहे. या प्रोमोला हटके कॅप्शन देण्यात आले आहे. प्रोमोच्या कॅप्शनमध्ये लिहिलं की, "न पाहिलेलं, न घडलेलं...तीन महामालिका, तीन महाखुलासे... 'तीन महामालिकांचा महासंगम'..."

प्रोमोवर चाहत्यांकडून कमेंट्सचा वर्षाव होत आहे. प्रेक्षक मालिका पाहण्यासाठी उत्सुक आहेत. मालिकांचा महासंगम 11 ते 15 ऑगस्ट दररोज रात्री 8:30 ते 10 वाजेपर्यंत स्टार प्रवाह वाहिनीवर पाहता येणार आहे. 'ठरलं तर मग' मालिकेत नुकताच विलास खून प्रकरणाचा निकाल लागला असून प्रियाला जन्मठेप तर साक्षीला तब्बल सात वर्षांच्या शिक्षा मिळाली आहे. तर वात्सल्य आश्रम पुन्हा उघडला आहे. सायलीच तन्वी असल्याचे सत्य आता लवकरच मधुभाऊंना समजणार आहे. प्रतिमाचा भूतकाळ तिला आठवणार आहे.

'लक्ष्मीच्या पाऊलांनी' मालिकेत कला राहुलचा पर्दाफाश करणार आहे. त्याच्या खोटेपणाचे तिला पुरावा मिळणार आहे. तर दुसरीकडे 'थोडं तुझं आणि थोडं माझं' मध्ये गायत्रीचा भूतकाळ सर्वांसमोर येणार आहे. त्यामुळे येणारा महासंगम खूपच रोमांचक असणार आहे. या तिन्ही मालिका आता कोणते वळण घेणार हे पाहणे महत्त्वाचे ठरणार आहे.