Shruthi Narayanan: तमिळ अभिनेत्री श्रुति नारायणन सध्या तिच्या कथित कास्टिंग काउच व्हिडिओमुळे चर्चेत आहे. हा १४ मिनिटांचा व्हिडिओ सोशल मीडियावर व्हायरल झाला असून, तो एका खासगी ऑडिशनचा असल्याचा दावा केला जात आहे. या व्हिडिओमुळे तमिळ चित्रपटसृष्टीतील कास्टिंग काउचच्या मुद्द्यावर पुन्हा एकदा चर्चा सुरू झाली आहे. मात्र, आता श्रुति नारायणनने या प्रकरणावर मौन सोडले असून, हा व्हिडिओ बनावट असल्याचा खुलासा केला आहे. तिने सोशल मीडियावर एक भावनिक पोस्ट शेअर करत या परिस्थितीचा तिच्या आणि तिच्या कुटुंबावर झालेला परिणाम व्यक्त केला आहे.

श्रुति नारायणनची प्रतिक्रिया

शुक्रवारी, २८ मार्च २०२५ रोजी श्रुति नारायणनने तिच्या इन्स्टाग्राम स्टोरीवर एक व्हिडिओ शेअर केला, यामध्ये एका सोशल मीडिया इन्फ्लुएन्सरने कृत्रिम बुद्धिमत्तेच्या (AI) सहाय्याने व्हिडिओ कसे तयार केले जाऊ शकतात हे स्पष्ट केले आहे. या व्हिडिओनंतर तिने एक संदेश लिहिला, त्यामध्ये तिने या प्रकरणावर आपली भूमिका मांडली. ती म्हणाली, "तुमच्यासाठी हा सगळा मनोरंजनाचा विषय असू शकतो, पण माझ्यासाठी आणि माझ्या जवळच्या लोकांसाठी ही खूप कठीण परिस्थिती आहे. विशेषतः माझ्यासाठी हे खूपच अवघड आहे आणि या परिस्थितीला सामोरे जाणे सोपे नाही. मीही एक मुलगी आहे, मलाही भावना आहेत आणि माझ्या जवळच्या लोकांनाही भावना आहेत. तुम्ही हे सगळं आणखी वाईट करत आहात."

तिने पुढे लिहिले, "मी तुम्हा सर्वांना नम्रपणे विनंती करते की, हे सगळं जंगलातल्या आगीसारखं पसरवू नका. जर तुम्हाला हे व्हिडिओ पाहायचेच असतील, तर तुमच्या आई, बहीण किंवा गर्लफ्रेंडचे व्हिडिओ पाहा, कारण त्याही मुली आहेत आणि त्यांचं शरीरही माझ्यासारखंच आहे. त्यांचे व्हिडिओ पाहून आनंद घ्या." या संदेशातून तिने व्हिडिओ बनावट असल्याचा संकेत दिला आणि लोकांना तो पसरवू नये अशी विनंती केली.

व्हिडिओचा वाद

हा १४ मिनिटांचा व्हिडिओ बुधवारी, २६ मार्च २०२५ रोजी ऑनलाइन व्हायरल झाला आणि त्यानंतर तो एक्स (पूर्वीचे ट्विटर), इन्स्टाग्राम आणि टेलिग्रामवर वेगाने व्हायरल झाला. काही सोशल मीडिया वापरकर्त्यांनी या व्हिडिओवर संताप व्यक्त केला, तर काहींनी त्याच्या सत्यतेवर प्रश्नचिन्ह उपस्थित केले. अनेकांनी हा व्हिडिओ डीपफेक असल्याचा अंदाज वर्तवला आहे. या व्हिडिओमुळे #ShruthiNarayananLeaked हा हॅशटॅग एक्सवर ट्रेंड झाला आणि त्याला २.४ लाखांहून अधिक पोस्ट मिळाल्या. मात्र, या व्हिडिओची सत्यता अद्याप सिद्ध झालेली नाही आणि पोलिसांकडेही कोणतीही औपचारिक तक्रार दाखल झालेली नाही.