सध्या सोशल मीडियावर आदित्य सरपोतदार यांच्या ‘मुंज्या’ चित्रपटाच्या ट्रेलरची जोरदार चर्चा होत आहे. नुकताच हा ट्रेलर सोशल मीडियावर रिलीज झालेला आहे. सध्या हा ट्रेलर चर्चेत राहण्याचं कारण म्हणजे या चित्रपटामध्ये अनेक मराठी कलाकार प्रमुख भूमिकेत आहेत. हा हॉररपट येत्या ७ जूनला थिएटरमध्ये रिलीज होणार आहे.

हॉरर कॉमेडी ट्रेलरच्या सुरुवातीला एक जंगल दिसत आहे. त्या जंगलामध्ये एक शापित ठिकाण आहे. त्या ठिकाणी एकही झाड नसते. तिथे फक्त मुंज्याची आत्मा असते. ट्रेलरमध्ये मुंज्या आणि मुन्नीची लव्हस्टोरी दाखवली आहे. दोघांनाही लग्न करायचे असते. पण त्यांची लग्न करण्याची ईच्छा अपूर्ण राहते. कारण मुंज्याचा लग्नापूर्वीच मृत्यू होतो. त्याच्या अस्थी जिथे पुरलेल्या असतात, त्या भागातील झाडं शापित होतात. म्हणून त्या जंगलातील काही भाग शापित असतो आणि तिथे एकही झाड नसते.

जंगलातील त्या शापित भागातील झाडाजवळ गेलेल्या मुलाला मुंज्या झपाटतो. आणि त्याच्याबरोबर तो सुद्धा मुन्नीला शोधायला शहरात येत असल्याचं ट्रेलरमध्ये दाखवलं आहे. शहरात आलेल्या त्या मुलाला आणि मुंज्याला शहरात आल्यावर मुन्नी भेटते का? आणि त्यांची अधुरी प्रेम कहाणी कशी पूर्ण होणार ? या प्रश्नाचं उत्तर आपल्याला चित्रपट पहिल्यावरच कळेल.

हॉरर कॉमेडी चित्रपटाची सध्या प्रेक्षकांमध्ये जोरदार चर्चा सुरू आहे. या चित्रपटाची निर्मिती ‘स्त्री’ चित्रपटाचे निर्माते मॅडॉक फिल्म्सने केली आहे. चित्रपटामध्ये प्रमुख भूमिकेत अभय वर्मा, शर्वरी वाघ, मोना सिंग आहेत. तर सुहास जोशी, रसिका वेंगुर्लेकर, भाग्यश्री लिमये आणि शर्वरी वाघ हे मराठमोळे सेलिब्रिटी ही प्रमुख भूमिकेत आहेत.