मुंबई : बॉलिवूडचा किंग खान शाहरूखला चित्रपटसृष्टीमध्ये ३० वर्षे पूर्ण झाली आहेत. या निमित्तानं त्याने त्याच्या चाहत्यांना मोठी ट्रीट दिली आहे. त्याने त्याच्या 'पठान'(Pathaan) या आगामी चित्रपटातील त्याच्या लूकचा टीजर शेअर केला आहे. यामध्ये शाहरुखने पांढऱ्या रंगाचा शर्ट आणि जीन्स घातली आहे. तो एका हातात बंदूक घेऊन उभा असलेला दिसत आहे. त्याचे लांब केसही प्रेक्षकांचे लक्ष वेधून घेत आहेत. त्याच्या चेहऱ्यावर जखमा दिसत आहेत. व्हिडिओ शेअर करताना त्याने इंडस्ट्रीत ३० वर्षे पूर्ण झाल्याचे सांगितले. चित्रपटाच्या माध्यमातून प्रेक्षकांना लवकरच भेटू असे सांगितले आहे.

शाहरुख खानने(shahrukh khan) शेअर केलेल्या या व्हिडीओमध्ये त्याने त्याचा पूर्ण चेहरा दाखवला आहे. याआधी रिलीज झालेल्या पोस्टर्स आणि टीझरमध्ये त्याचा पूर्ण लूक दाखवला नव्हता. शाहरुखचा हा रफ अँड टफ लूक खूपच आकर्षक दिसत आहे. शाहरुखला चित्रपटसृष्टीमध्ये ३० वर्षे पूर्ण झाली आहेत. त्या निमित्ताने हा व्हिडिओ त्याच्या चाहत्यांसाठी एखाद्या मोठ्या ट्रीटपेक्षा कमी नाही.

हा व्हिडिओ आपल्या सोशल मीडिया अकाऊंटवर शेअर करताना शाहरुख खानने लिहिले की, '३० वर्षे पूर्ण. तुम्ही दिलेल्या प्रेमासाठी धन्यवाद. हा प्रवास असाच पुढे ठेवण्यासाठी घेऊन येत आहे #पठान. यशराज फिल्म्सची ५० वर्षे साजरी करूयात #पठानसोबत २५ जानेवारी २०२३ ला सर्वत्र प्रदर्शित.

शाहरुख खानने जॉन अब्राहम आणि दीपिका पदुकोणलाही या व्हिडिओमध्ये टॅग केले आहे. सिद्धार्थ आनंदने 'पठान' या चित्रपटाचे दिग्दर्शन केले असून, या चित्रपटात जॉन अब्राहम आणि दीपिका पदुकोण यांच्या महत्त्वाच्या भूमिका आहेत. तसेच या चित्रपटात सलमान खानचा एक खास कॅमिओदेखील असणार आहे. तसेच शाहरुख खान सलमान खानच्या 'टायगर ३'मध्ये दिसणार आहे.

शाहरुख खान तब्बल ५ वर्षांनंतर मोठ्या पडद्यावर दिसणार आहे. २०२३ मध्ये तो 'पठान', 'डंकी' आणि 'जवान' या चित्रपटांमध्ये दिसणार आहे. २०२३ मध्ये त्याला मोठ्या पडद्यावर पाहण्यासाठी त्याचे चाहते खूप उत्सुक आहेत.