Salman Khan: बॉलिवूड सुपरस्टार सलमान खानने अलीकडेच आपल्या इंस्टाग्रामवरून आपल्या भावाचा, सोहेल खानचा, आगामी तेलुगू चित्रपट 'अर्जुन सन् ऑफ वैजयंती' मधील एक अ‍ॅक्शन सीन शेअर केला आहे. या पोस्टमुळे चाहत्यांमध्ये उत्सुकता निर्माण झाली आहे. सोहेल खान या चित्रपटात 'पठाण' नावाच्या खलनायकाची भूमिका साकारत आहे, ज्यामध्ये तो नंदमुरी कल्याण रामच्या पात्राशी भांडताना दिसणार आहे.

'अर्जुन सन् ऑफ वैजयंती' हा चित्रपट प्रदीप चिलुकुरी यांनी दिग्दर्शित केला असून, यामध्ये नंदमुरी कल्याण रामने अर्जुनची भूमिका साकारली आहे. अर्जुन हा एक आयपीएस अधिकारी होण्याचे स्वप्न पाहणारा युवक आहे, परंतु काही अनपेक्षित घटनांमुळे तो गुन्हेगारीच्या मार्गावर वळतो. त्याची आई, वैजयंती (विजयशांती), एक कर्तव्यनिष्ठ पोलीस अधिकारी आहे, जी आपल्या मुलाच्या या बदलामुळे व्यथित होते. चित्रपटाची कथा आई-मुलाच्या नात्यातील भावनिक संघर्ष आणि गुन्हेगारीच्या जगातील त्यांच्या संघर्षावर आधारित आहे.

चित्रपटाच्या टीझरमध्ये उच्च दर्जाच्या अ‍ॅक्शन सीन आणि भावनिक क्षणांची झलक दिसते. विशेषतः, सोहेल खानचा खलनायक म्हणून अ‍ॅक्शन सीन चाहत्यांना आकर्षित करत आहे. चित्रपटात सई मांजरेकर, श्रीकांत आणि बाब्लू पृथ्वीराज यांच्याही महत्त्वाच्या भूमिका आहेत. या चित्रपटाच्या पोस्टवर चाहते म्हणाले, आम्हाला तुला अशाच भूमिकामध्ये बघायचं आहे. तर, एकाने लिहिले, सलमानचं ओल्ड व्हर्जन बघितल्या सारखं वाटलं.

'अर्जुन सन् ऑफ वैजयंती' १८ एप्रिल २०२५ रोजी प्रदर्शित झाला असून, चित्रपटाला प्रेक्षकांकडून चांगला प्रतिसाद मिळत आहे. सलमान खानच्या पोस्टमुळे चित्रपटाची लोकप्रियता आणखी वाढली आहे. सोहेल खानच्या अ‍ॅक्शन भूमिकेची चर्चा सोशल मीडियावर सुरू आहे.