नागराज मंजुळेचा 'सैराट' या चित्रपटाने महाराष्ट्राला वेड लावलं. परश्या आणि आर्ची यासारख्या पात्रांसारखं इतर पात्रांनाही अल्पावधीतच लोकप्रियता मिळाली. याच चित्रपटातील सल्याची भूमिका साकारणारा अभिनेता अरबाज शेख आजही या भूमिकेमुळे ओळखला जातो. काही दिवसांपूर्वी वडिलांच्या उपचारादरम्यान रुग्णालयाकडून औषधांच्या नावाखाली आर्थिक लूट होत असल्याचा आरोप करत त्याने सोशल मीडियावर एक व्हिडीओ शेअर केला होता. आता त्याचा आणखी एक व्हिडिओ व्हायरल होत आहे. त्या व्हिडिओमध्ये अभिनेत्याने रॉकेल प्यायल्याचं म्हटलं आहे.

अरबाज शेखने नुकतीच राजश्री मराठीला एक मुलाखत दिली. या मुलाखतीत त्याने आपल्या लहानपणीच्या खोडकर स्वभावाबद्दल आणि त्या काळातील अनेक आठवणींना उजाळा दिला. याचवेळी त्याने असा एक प्रसंग सांगितला, ज्याबद्दल आतापर्यंत फार कमी लोकांना माहिती होती. बालपणातील आठवणी सांगताना अरबाज म्हणाला, "मी लहानपणी खूप अगाऊ होतो. दिवसभर खेळणं, सायकल चालवणं, मित्रांसोबत भांडणं आणि खूप मार खाणं हे सगळं माझ्या रोजच्या आयुष्याचा भाग होतं. माझ्या खोड्यांमुळे घरच्यांना मला सतत सांभाळावं लागायचं."

याच गप्पांमध्ये त्याने एक धक्कादायक अनुभव सांगितला. "स्टोव्हमध्ये वापरतात ते रॉकेल मी लहानपणी चुकून प्यायलो होतो," असा खुलासा त्याने केला. त्याच्या या वक्तव्याने अनेक चाहत्यांनाही आश्चर्याचा धक्का बसला आहे. मात्र, हा प्रसंग त्याच्या लहानपणी घडला असल्याचे स्पष्ट केले.

अरबाजच्या कबुलीची सोशल मीडियावरही चर्चा रंगली आहे. आपल्या आयुष्यातील चांगले-वाईट अनुभव कोणताही आडपडदा न ठेवता तो चाहत्यांसमोर मांडत असल्यामुळे अनेकांनी त्याच्या स्पष्टवक्तेपणाचे कौतुक केले आहे. सैराटनंतर अरबाज शेख अभिनयासोबतच तो सोशल मीडियावरही सक्रिय असून वैयक्तिक आयुष्यातील अनुभव चाहत्यांशी शेअर करत असतो.