मुंबई : प्रसिद्ध कॉमेडियन राजू श्रीवास्तव गेल्या १५ दिवसांपासून बेशुद्धावस्थेत आहे. १० ऑगस्ट रोजी राजू श्रीवास्तवला (Raju Srivastava) जीममध्ये ट्रेडमिलवर चालताना हृदयविकाराचा झटका आला होता. राजूला तातडीने दिल्लीतील एम्स रुग्णालयात दाखल करण्यात आले होते. तेव्हापासून त्याचे चाहते त्याच्यासाठी सतत प्रार्थना करत आहेत. राजूचा पर्सनल सेक्रेटरी गरवीत नारंग याने एक निवेदन जारी करून राजूच्या प्रकृतीत सातत्याने सुधारणा होत असल्याचे म्हटले आहे. परंतु, राजू श्रीवास्तव शुद्धीवर आला असल्याच्या अफवा सोशल मीडियावर मोठ्या प्रमाणात व्हायरल होत आहेत.

माहितीनुसार, राजू श्रीवास्तवला शुद्ध आली असल्याचे वृत्त खोटे असून राजू श्रीवास्तवची मुलगी अंतरा हिने(Social Media) सोशल मीडियाच्या माध्यमातून एक पोस्ट शेअर करत माहिती दिली आहे. राजूच्या इन्स्टाग्राम हॅंडलच्या स्टोरीवर अंतराने एक निवेदन जारी केलं आहे. या निवेदनात असे म्हटले की, 'माझे वडील राजू श्रीवास्तव यांच्या प्रकृतीमध्ये हळूहळू सुधारणा होत आहे. पण ते अजूनही व्हेंटिलेटरवरच आहेत. फक्त एम्स रुग्णालय आणि राजू श्रीवास्तव अधिकृत सोशल मीडिया अकाउंटवरून येणाऱ्या अपडेटवरच विश्वास ठेवा अशी नम्र विनंती'.

याचबरोबर अंतराने पुढे लिहिले आहे की, 'एम्स रुग्णालयातील डॉक्टरांची संपूर्ण टीम त्यांच्या प्रकृतीवर लक्ष ठेवून आहेत. आम्ही सर्व डॉक्टरांचे आणि सर्व शुभचिंतकांचे आभारी आहोत. माझी, माझ्या वडिलांच्या सर्व चाहत्यांना विनंती आहे की त्यांच्यासाठी अशीच प्रार्थना कायम करत राहा'.

राजू श्रीवास्तवच्या प्रकृतीबाबत त्याच्या मॅनेजरने सांगितले की,'डॉक्टर त्यांची विशेष काळजी घेत आहेत आणि डॉक्टरांच्या म्हणण्यानुसार, राजू श्रीवास्तवच्या प्रकृतीत हळूहळू सुधारणा होत आहे. मात्र, राजू अजूनही व्हेंटिलेटरवर आहे.