Rohit Shetty House Firing: बॉलीवूडमधील प्रसिद्ध दिग्दर्शक रोहित शेट्टी यांच्या घरावर झालेल्या गोळीबार प्रकरणाला धक्कादायक वळण मिळाले असून या घटनेत पुणे कनेक्शन समोर आले आहे. पुणे पोलिसांनी या प्रकरणात मोठी कारवाई करत चार संशयितांना ताब्यात घेतले आहे. ही कारवाई पुण्यातील वारजे आणि कर्वेनगर परिसरातून करण्यात आली असून, एकच खळबळ उडाली आहे.

सूत्रांनी दिलेल्या माहितीनुसार, ताब्यात घेतलेले चारही जण देशातील कुख्यात गँगशी संबंधित असल्याची प्राथमिक माहिती समोर आली आहे. या चौघांची पार्श्वभूमी, संपर्क आणि हालचाली संशयास्पद असल्याने पुणे पोलिसांनी गुप्त माहितीच्या आधारे ही कारवाई केली. चौकशीदरम्यान या आरोपींचे मुंबईतील गुन्हेगारी टोळ्यांशी संबंध असल्याचे चिन्ह दिसून आले आहेत.

रोहित शेट्टी यांच्या घरावर झालेल्या गोळीबार प्रकरणामुळे संपूर्ण मनोरंजन विश्वात आणि राजकीय वर्तुळातही खळबळ उडाली होती. सुरक्षेच्या दृष्टीने हे प्रकरण अतिशय गंभीर आहे. या घटनेनंतर मुंबई पोलिसांसह राज्यातील विविध तपास यंत्रणा अलर्ट मोडवर गेल्या आहेत. त्याच पार्श्वभूमीवर पुणे पोलिसांनी तपासाची सूत्रे अधिक घट्ट करत पुण्यातील काही संशयित हालचालींवर लक्ष केंद्रित केले होते.

तसेच राष्ट्रवादी काँग्रेसचे नेते बाबा सिद्दिकी यांच्या हत्या प्रकरणातील गँगचा बॉलीवूड दिग्दर्शक रोहित शेट्टी यांच्या घरावर झालेल्या हल्ल्याशी संबंध असल्याचा गंभीर संशय पोलिसांनी व्यक्त केला आहे. पुणे पोलिसांनी ताब्यात घेतलेले चार जण हे बाबा सिद्दिकी हत्या प्रकरणात सक्रिय भूमिका बजावलेल्या त्याच गँगचे सदस्य असल्याची माहिती समोर आली आहे.